Angel Productions cu proyecto nobo tocante abuso sexual di mucha: “Investigacion Cronico”

Stephanie Croes y Gianelly Leo a relata: -  ORANJESTAD (AAN) —  Angel Productions, ta trahando riba un proyecto nobo cu ta un pelicula relaciona cu abuso sexual di mucha

y a yama un  conferencia di prensa, den cual e hobennan actriz, y ayudante di coordinacion di e proyecto,  Stephanie Croes y Gianelly Leo, a hiba palabra.

E nomber di e produccion nobo ta “Investigacion Cronico” y tambe Pedophile,  Stephanie Croes a declara. Esaki ta un pelicula basa riba abuso sexual di mucha, y Pedophile.

“E biaha aki tambe nos tin un elenco basta grandi compara cu nos dos prome peliculanan: Natalia y Huicio Perfecto, y mayoria ta actornan nobo. E ta un tema hopi delicado, y un storia cu ta sali for di e director su pasado mes. Hopi di nos conoce un persona cu a pasa door di abuso sexual. Y esaki ta un storia cu nan kier a trece dilanti riba diferente aspecto. Aspectonan visual cu por haci un diferencia. E no ta bay mustra hopi pero e ta duna bo e intencion di algo. Anto e vision ey por duna un hende visibilidad pa por ta presente na e momento ey, pa por coregi algo cu, por ta, ta bayendo fout y por haci un diferencia den un persona su bida cu abuso sexual no pasa cu e persona aki; pues, esey ta loke nos kier logra cu e pelicula aki y cu e apoyo di Aruba”, Stephanie a relata.

Gianelly Leo, ademas di actriz y coordinador, ta encarga cu recaudacion di fondo pa por filma e proyecto aki.

“E proyecto aki ta bao direccion di Angelo Croes, y hunto cu Luty Martinez a skirbi e storia aki. E pelicula aki ta concientiza hobennan y e meta ta pa pase na scolnan unda cu tur mucha y hoben por wak’e y asina ey haya e concientizacion riba abuso sexual”, Gianelly a menciona.

E hoben a agrega cu e recaudacion di fondo ta mediante un rifa y dia 7 di October lo saca e premio live via e facebook page di e compania. El a subraya cu un filmacion asina no ta barata, y nan kier hibe internacionalmente, ya cu “Huicio Perfecto” ta e prome pelicula cu a wordo nomina pa e premio International “Golden Globe”, unda Aruba a wordo representa pa prome biaha. E proyecto nobo nan kier trece dilanti pa otro aña tambe e por participa den e premio menciona.

Dia 19 di September proximo, nan ta cuminza filma e prome escenanan. Na Maart 2022 e pelicula ta programa pa sali.

Finalmente, Gianelly a expresa palabranan di gradicimento na tur actor, e personanan cu ta bay filma henter e produccion, cu ta un sponsor principal grandi cu a baha e gastonan pa e filmacion y tur e sponsornan cu a yuda te aworaki cu e proyecto.