ORANJESTAD (AAN): Guarda Costa ta tuma nota cu regularmente personanan ta sigui tira pisca cu harpoen sin cu nan tin un permiso. Den e ultimo temponan aki Guarda Costa a haya nan mes cu diferente di e casonan aki.
Guarda Costa kier recorda tur persona y usuario di harpoen riba e leynan vigente
ariba uso di harpoen.
Na november 2020 Gobierno di Aruba a introduci un asina yama ‘gedoogbeleid’ cual ta haci e
uso di un harpoen den lama legal. Sinembargo esaki ta mara na diferente condicion cu e usuario mester tene su mes na dje.
Un suplica ta bai pa e usuarionan studia e condicionnan aki bon pa por compronde kico ta permiti ora ta pisca cu harpoen. Den caso cu un di e condicionnan aki wordo viola, e ‘gedoogbeleid’ lo no ta na vigor mas y e ambtenaar di Guarda Costa of Polis por actua a base di e ley existente (landsbesluit verboden onderwaterjachtmiddelen).
Guarda Costa kier a pone enfasis cu den e zonanan cora manera indica riba e mapa adhunto no
ta permiti pa tira pisca y tampoco no ta permiti pa ta den posesion di un harpoen. Unico excepcion pa posesion di harpoen den areanan cora ta si e harpoen ta poni den un boto pa asina por sali pa bay den areanan permiti of drenta bek.
Un persona no por sali for di canto di lama y landa cu su harpoen den man pa asina e bai den e area cu ta permiti, vise versa tampoco no ta permiti. Pues cu otro palabra no por pasa landa den area prohibi cu harpoen den man pa yega tera.
Na momento cu Guarda Costa tuma nota di un tiramento di pisca sin cu tin un permiso pa esaki
Guarda Costa lo actua debidamente. Piscadonan cu kier haya un permiso pa pisca cu harpoen por bishita Santa Rosa pa ricibi tur informacion tocante un permiso.
Guarda Costa ta informa cu personanan cu ta mantene nan mes debidamente na tur e reglanan manera stipula den e ‘gedoogbeleid’ lo no haya nan mes den un situacion unda cu autoridad lo mester actua contra nan.
