A sali na cla cu e barco Zr.Ms. Holland tambe a yuda den captura di droga na Noordwest di Aruba

Nan a los tiro di helicopter pa destrui outboard engines

ORANJESTAD (AAN): Tabata siman pasa caba cu DIARIO a publica e relato aki di captura di transporte di droga, na como 260 km Noordwest di Aruba door di oficialnan di Marina y Guardacosta Colombiano.

   Pero e siman aki, un boletin emiti door di Marina Hulandes ta confirma cu e barco di Marina Hulandes, esta Zr.Ms. Holland tambe a yuda intercepta e transportenan aki di droga cu a socede na fin di Februari.

   A ser splica, cu e speedboat tipo GoFast a keda descubri pa medio di un avion di patruya maritimo di Wardacosta di Caribe Hulandes y un helicopter di Marina Colombiano.

   Zr.Ms. Holland a manda un helicopter embarca di US Coast Guard y y nan speedboat tipo FRISC, un boto di rapid respons cu un team combina di tripulacion di e barco, y a bay abordo di e destakamentu di mantencion di ley di US Coast Guard.

   Despues di a duna e contrabandistanan un señal pa stop, e GoFast no kier a stop.  Esey a pone cu a sigui cu e proceso pa los algun tiro di advertencia dilanti e GoFast.  Ora cu esey tampoco no a yuda, a usa algun francotirador for di Helicopter cu a mik preciso y destrui e Outboard Engines di e boto.  E presunto contrabandistanan e ora obliga a entrega nan mes.

   E di dos GoFast a keda deteni pa e barku di Marina Kolombiano ARC Victoria. Aunke DIARIO siman pasa a menciona cu riba di 700 kilo a ser gara, awor Marina Hulandes ta bisa cu en total 800 kilo di cocaina a keda confisca.

   Zr.Ms. Holland desde October 2022 a keda desplega como barco patruyero den Region Caribe Hulandes, y ta alterna e lucha contra droga cu apoyo di Wardacosta di Caribe Hulandes y cu US Coast Guard.  E barconan Hulandes den Region Caribe tambe ta coopera cu Marina di Colombia den e lucha contra droga.