ORANJESTAD (AAN) – Directora di Biblioteca Nacional, señora Astrid Britten, a yama un conferencia di prensa den cual a anuncia cu miembresia di edad di 0 pa 18 aña, a bira gratis.
Britten a expresa cu nan ta yama bon bini na esnan cu no ta miembro ainda pa haci uso di e oportunidad y bira miembro di esaki.
“Biblioteca Nacional Aruba ya pa hopi aña, ta motiva tur persona pa lesa. E ta un punto importante di e maneho di Biblioteca, cu ta e lesamento. Tambe nos a introduci den cuadro di esaki, programanan y un di nan ta nos Festival di Buki pa mucha, cu aña pasa nos a para keto na e di 30 edicion di Festival di Buki pa Mucha”, Astrid Britten a señala.
El a sigui bisa cu naturalmente, birando miembro di BNA tin beneficio. E ta duna mucha y hoben, un coleccion grandi cu nan por haci uso di dje. “Nos tin material na nos idioma oficial Papiamento, Hulandes naturalmente ainda, pasobra nos tin un sistema di educacion na Hulandes, Spaño, Ingles, y hasta nos tin un coleccion mas chikito di Frances. Nos ta ofrece acceso na Internet, y loke nos ta yama ‘free wifi’. Mi ta mira cu despues di oranan di scol, akinan ta bon concuri y hopi mucha ta bin pa haci uso di e facilidadnan aki”, Britten a indica.
El a agrega cu mas y mas ta rekeri pa traha den grupo, pues no tin un lugar mas ideal tey na Biblioteca, naturalmente, Astrid Britten a remarca.
“Banda di esey, si bo bira miembro, bo tin acceso na E-books, pues locual nos ta puntra tur ora. Nos tin un acuerdo cu Hulanda, y bo ta haya un codigo, y door di e codigo aki, bo por haci uso di e E-books cu tin disponible y cu nos tin un cantidad di esey, pero no solamente E-books sino audio-books tambe”, Astrid Britten a relata.
El a agrega cu, naturalmente, e publico di BNA ta diverso, pasobra Biblioteca ta pa tur hende, cu acceso liber, y no tin distincion, el a añadi.
Directora di Biblioteca a subraya tambe cu nan tin un coleccion cu ta inspira hende cu temanan diverso, pues: “Ban yega na Biblioteca!”
Actualmente ta tumando lugar na Biblioteca, e renovacionnan necesario y dentro di poco lo tin un espacio hopi mas favorable, y un Leis Café cu ta bay tin pronto na BNA.
Finalmente, Astrid Britten a bisa cu e iniciativa di ofrece miembresia gratis na e grupo 0-18 aña a nace na Hulanda aña pasa. Despues a uni e Islanan BES (Bonaire, Eustatius y Saba) y tambe a pidi e Islanan CAS, cu ta Curacao, Aruba y Sint Maarten.
