Ministro Glenbert Croes ta orguyoso di nan
- Medidanan cu nan a tuma awor ta pa garantiza suministro confiabel
ORANJESTAD (AAN): Gerencia y profesionalnan di WEB Aruba NV recientemente a reuni cu Minister Glenbert Croes referente e problemanan cu Aruba a conoce den suministro di coriente.
Durante e reunion, esnan di WEB Aruba NV a presenta na Minister tur e pasonan cu a worde tuma y cu te ainda ta tumando pa sigura y garantisa suministro di awa y coriente na nos pueblo.
E ultimo blackouts a causa frustracion y disgusto grandi den nos pueblo pa cual motibo e mandatario a instrui Utilities Aruba NV pa laga haci un audit independiente pa por determina kico por ta e causa di e interupcionnan aki.
WEB a inverti un suma substancial den e planta di Wartsila hustamante pa garantisa e suministro. Di e momento cu e planta nobo di Wartsila a bay den uzo, esaki a trece cu ne cu suministro a cay na diferente ocasion.
Pero WEB y su profesionalnan a lora manga, a tuma accion pa internamente mes averigua unda e problema por ta. Y diahuebs ultimo a presenta e resultado di nan investigacion y medidanan cu a tuma pa sigura y garantisa un suministro confiabel y stabil pa pueblo.
“Como Minister di Energia mi ta sumamente orguyoso di nan tur y agradecido pa tur e esfuersonan haci”, e mandatario a expresa.
