A honra 43 trahado ehemplar den turismo durante 'AHATA Excellence Awards 2023'

ORANJESTAD (AAN): Diasabra anochi a tuma lugar e evento grandioso AHATA Excellence Awards, organiza pa Aruba Hotel & Tourism Association (AHATA).

Durante un ceremonia elegante, 230 invitado a reuni pa celebra y premia 43 persona excepcional cu ta forma e base di e exito di nos industria turistico.

E AHATA Excellence Awards ta un reconocemento pa personanan cu constantemente ta enfoca riba servicio sobresaliente y ta contribui di un manera inigualabel na e exito di nos isla como destinacion turistico. E honoradonan a disfruta di un tremendo anochi cu ambiente festivo, unda nan a ricibi un trofeo especial den forma di kokolishi, cual ta simbolo pa hospitalidad. E premionan a wordo presenta riba escenario pa Presidente y CEO di AHATA, Sra. Tisa LaSorte.

            Figuranan clave di e sector turistico a asisti e ceremonia, incluyendo Minister di Turismo y Salud Publico, Sr. Danguillaume Oduber, CEO di Aruba Tourism Authority (ATA), Sra. Ronella Croes, y miembronan di e hunta di ATA.

            Den e proximo simannan, AHATA lo resalta cada honorado atraves di nan medionan social. Pa wak e personanan excepcional aki papia di nan motivacion y pasion den nan trabao, por sigui AHATA riba Facebook of riba Instagram na @arubahata.

            AHATA ta expresa gratitud profundo na tur e honoradonan cu ta sigui eleva e industria turistico di Aruba na altura nobo.