Total di 750 mucha a participa na IBiSA Kids Run 2024

ORANJESTAD (AAN): Un total di 750 mucha y hoben a participa den IBiSA Kids Run & Olympic Day Celebration den fin di siman.

   Esnan cu a participa ta entre 4 pa 17 aña di edad. Manera ta conoci, tur aña riba e fecha 23 di juni, ta celebra Dia Olimpico Internacional. IBiSA Kids Run ta e careda mas grandi pa mucha. E aña olimpico aki, a celebra e importancia di movecion pa cu salud, bienester general y e impacto positivo social den nos comunindad.

   E careda a tuma luga dilanti di oficina nobo di Comite Olimpico Arubano (COA) na Vondellaan. Minister Endy Croes tabata presente pa duna inicio na e careda aki.

E IBiSA Kids y Youth  Run a cuminsa pa exactamente 6 or di mainta. IBiSA Kids and Youth Run ta e careda mas grandi pa mucha. E muchanan tabata contento di por forma parti di e celebracion mundial aki. Hunto cu nan amistad, famia y maestronan di scol, e muchanan a disfruta di un dushi mainta deportivo. Por ultimo, e mandatario di Deporte ta felicita IBiSA y Comite Olimpico Arubano y tur cu a yuda haci e careda aki posibel y exitoso.