Cuatro grupo final pa Mens Erger Je Niet Live ya ta conoci

ORANJESTAD (AAN): Cua grupo ta bira Campeon di Mens Erger Je Niet Live 2024.  

Sea ta “Oruans Rocks”, of ta “Gaña Sa”, kizas ta “Blue Energy Hilton Hotel”, of e grupo “No Cunsumi”?

   E campeonato a cuminsa dia 20 di April cu 64 grupo.  Pa e fin di siman aki, esta Diabierna 28 di Juni pa 8:00 pm, ta cuatro grupo so a keda invicto y un so por bira campeon di Mens Erger Je Niet Live 2024.

   Siman pasa Diabierna den e weganan Semifinal, e gruponan di Mens cu a hunga tabata Falcetas, WEB, Blue Energy Hilton Hotel, y Busje Komt Zo.  Despues a sigui Oruans Rocks, Pv 2 Good 4, Gaña Sa, y Pevesa Setar.

   Siman pasa Diasabra a hunga No Cunsumi, Kill By The Dice, Busje Komt Zo, Blue Energy Hilton Hotel.

   Den un par di wega dramatico yena di tension y alegria, esunnan cu ta sigui pa e gran final pa Diabierna awor 28 di juni ta e cuatro gruponan invicto: “Oruans Rocks”, “Gaña Sa”, “Blue Energy Hilton Hotel” y “No Cunsumi”.

   Centro di Bario Brazil ta invita tur grupo di Mens Erger Je Niet Live, pa 8:00 pm bin presencia e bataya entre e invictonan.

   Despues di tur e tiramento di “dow” e famoso DJ di Centro di Bario Brazil ta bay sorprende tur presente. Entrada ta un smile, pero mester ta uno masha grandi si.  Hopi danki na tur hende di parti di Eddie Dandlau y Centro di Bario Brazil na tur 64 grupo cu a haci e di 16 aña di Mens Erger Je Niet Live un exito atrobe.