Organizadornan di ‘Parents League Soccer Tournament 2024’ a presenta un exitoso campeonato

Ministro tambe a felicita nan

ORANJESTAD (AAN): Ademas di mira muchanan ta hunga futbol, kico mas lo ta interesante pa mira?

   Esey a wordo presenta durante fin di siman cu a pasa!  A laga e mayornan di e muchanan aki subi veld y hunga bala!

   Asina na Aruba a tuma luga e prome edicion di Parents League Soccer Tournament 2024. Bao di un entusiasmo y publico grandi e prome campeonato di futbol pa mayor a inicia diasabra, unda e rol a cambia y a toca turno na e mayornan pa demostra nan talento riba veld.

   Como mayor semper bo ta apoya bo yiu sea na banda di tereno of den tribuna, pero awo e mayor mes a haya e oportunidad pa experencia e presion riba tereno di bala. Awo ta turno pa e yiunan apoya nan mama y/of tata hungando futbol. E meta di e torneo ta pa motiva comunidad pa ta mas envolvi den deporte na Aruba. A cuminsa cu futbol, pero e idea ta involucra mas deporte entre otro, baseball y tennis.

   Un total di 8 ekipo a bataya contra otro pa conkista e titulo maximo. E torneo di e mamanan, esta Soccer Mom a ser dedica na e legendario Jeanine Jansen (den feliz memoria). Na final di e tremendo partidonan e ekipo ASV River Plate a titula campeon di futbol di hende muhe di e prome Parents League Soccer Tournament.

   Diadomingo atardi, den Compleho Deportivo Frans Figaroa na Noord e popular torneo a continua, unda cu a toca turno na e tatanan Soccer Dad pa demostra na talento. Soccer Dad a ser dedica na e legendario Albert Lake (den feliz memoria).

   Minister Endy Croes tabata presente, unda el a hiba palabra y a desea e ekiponan hopi exito. “Deporte ta trece nos hunto, fortifica y uni un pueblo. Uni semper nos ta mas fuerte.” E mandatario di Deporte a subraya. Sin duda e publico presente por a gosa di dos dia di campeonato inolvidabel.

   Tambe por a nota presencia cu Minister Rocco Tjon (San Luis Deportivo) y Minister Dangui Oduber (S.V. Bubali), ambos a debuta den e torneo aki. Na final di e anochi, ekipo di RCA a conkista e titulo di campeon di Soccer Dad di Parents League Soccer Tournament 2024. Pa finalisa, e mandatario di Deporte ta gradici e comision organizado, esta Señora Vanessa Leer, Señora Irella Partodikromo, Señora Jessica Rivero, Señora Michelle Every y boluntarionan pa organiza un tremendo y exitoso evento deportivo pa e mayornan cu nan yiu ta hunga den federacion di futbol.