RBC a renoba sponsorship di Barracudas Artistic Swimming Club

Despues di un temporada cu un cantidad record di medaya

ORANJESTAD (AAN): E compania RBC Royal Bank (Aruba) N.V. (RBC) ta orguyoso di anuncia continuacion di su sponsorship di Barracudas Artistic Swimming Club di Aruba, despues di un temporada historico den cual e atletanan di e club a regresa cas cu shete medaya for di e Weganan Centroamericano y Caribeño 2026 na Santo Domingo.

   Barracudas a logra un prestacion historico durante e Weganan di e aña aki, poniendo Aruba na tercer luga den e clasificacion di medaya di landamento artistico, cu dos medaya di plata y cinco medaya di brons. Kim Deiman a encabeza e resultadonan cu un medaya di brons den e rutina tecnico solo y un medaya di plata den e rutina liber solo.

   Deiman y Janneke Dirven a forma pareha y a conquista un medaya di plata den e rutina tecnico di duo y un medaya di brons den e rutina liber di duo. E team completo (Kim Deiman, Mariajose Salazar, Kendra Simon, Nakaylee Didder, Khloë Rafini y Janneke Dirven) a conquista medaya di brons den e rutina di ekipo tecnico, rutina di ekipo liber y rutina di ekipo acrobatico.

   E exito di e club ta sigui despues di un otro logro importante na e Weganan Panamericano Hubenil 2025 na Asuncion, Paraguay, unda e duo Arubano di Xiana Hoo y Kendra Simon a representa Aruba riba escenario continental.

   Pierre Rafini, Vicepresidente di Commercial Banking di RBC pa Caribe Hulandes y Country Manager pa Aruba, a expresa su orguyo tocante e sponsorship.

   “Ta un honor pa mi celebra continuacion di nos sponsorship di Barracudas Artistic Swimming Club, y ki aña extraordinario esaki tabata pa e atletanan excepcional aki,” Rafini a bisa. “Como un tata orguyoso di un landado di landamento artistico, e mundo impresionante di landamento artistico no ta desconoci pa mi.  Mi mes a presencia e esfuersonan di e atletanan hoben aki — cu ta entrena seis dia pa siman, demostrando dedicacion, perseverancia y un pasion incansabel pa e deporte aki, cu ta un combinacion di landamento, baile y gimnastica.”

   Entre e historianan sobresaliente di e ekipo tin esun di Khloë Rafini, di 14 aña, kende a wordo reconoci como e atleta di mas hoben cu a competi na e Weganan di 2026, un muestra poderoso di e futuro prometedor cu landamento artistico tin dilanti na Aruba.

   Carolina Merryweather-Raven, Presidente di Barracudas Artistic Swimming Club, a enfatisa importancia di sosten di comunidad. “Como un club deportivo non-profit, nos ta depende di sosten di comunidad pa por proporciona nos atletanan cu e recursonan esencial cu nan tin mester. E resultadonan di e aña aki ta prueba di loke por logra cu e sosten ey.”

   Mirando pa futuro, RBC ta orguyoso di sigui sostene e Programa di Desaroyo y Accesibilidad pa Atletanan di Barracudas. E contribucion lo yuda e club cubri parti di e gastonan di entrenadornan cualifica y entrenamento specialisa, permitiendo e club mantene e contribucionnan di e atletanan na un nivel rasonabel, mientras cu e ta sigui eleva e nivel di landamento artistico na Aruba.

   “Ora RBC un aña pasa a anuncia e sponsorship aki pa prome biaha, nos a papia di nos conviccion den e poder di deporte pa forma bida di hobennan,” Rafini a continua. “Awe, nos no tin nodo di imagina e impacto ey — nos por mir'e den e medayanan, si, pero tambe den e momentonan trankil tras di nan: e sesionnan di entrenamento den piscina mainta trempan, e rutinanan perfecciona despues di mas di shen repeticion, y e confianza cu a wordo construi entre e parehanan den awa.”

   RBC Royal Bank ya pa hopi tempo ta sostene desaroyo di hobennan y comunidad na Aruba. E banco ta considera su sponsorship no como caridad, sino como un inversion den e personanan cu lo contribui na forma futuro di e isla.

   Rafini tambe a felicita e landadonan, entrenadornan, mayornan y sostenedornan di Barracudas Artistic Swimming Club y a desea nan exito continuo.