Pueblo kier sa mas di brug di Rooi Afo cu ta cumpli un aña caba cera

Parlamentario Xiomara Maduro cu pregunta oficial:

ORANJESTAD (AAN): Dia 11 di februari 2026 ta cumpli exactamente un aña cu e brug di Rooi Afo ta cera pa trafico. Desde 11 februari 2025, e caminda riba e dam di Rooi Afo ta cera, y te cu awe, e bisiñanan y usuarionan no a ricibi ningun informacion ki dia e trabaonan di reparacion lo cuminsa y ki dia e brug lo habri bek.

   E situacion aki ta causa hopi frustracion y molester pa e residentenan di Rooi Afo, ya cu e ciere prolonga di e brug, ta afecta e accesibilidad, seguridad den trafico, mobilidad diario, y tambe actividad economico den e zona.

   Pa e motibo aki, Parlamentario Xiomara Maduro a haci algun pregunta oficial na Minister Herde di Infrastructura, cu e proposito di haya claridad y un plan concreto pa informa e bisiñanan y comunidad debidamente.

   Den e preguntanan oficial, a pidi ministerio claridad riba e siguiente puntonan: (*) Ki tempo Gobierno ta plania pa drecha e brug/dam di Rooi Afo? (*) Ki termino of fecha e ministerio por duna pa habrimento di e caminda pa trafico normal? (*) Ki trabaonan specifo lo wordo haci pa drecha e infrastructura (manera reforza e structura, reparacion di fundushi, mehoracion di drenahe, asfalt, leuning, etc)? (*) Pakico e proceso di reparacion a tuma tanto tempo, considerando cu e ta un conexion importante pa e bario? (*) Ki medida temporal Gobierno a tuma of lo tuma pa disminui e incomodidad y riesgo pa residente y trafico mientras e brug ta cera?

   Parlamentario Maduro ta spera cu Minister Herde por contesta pronto y presenta un plan di accion concreto cu un timeline realistico, pa asina e bario di Rooi Afo por sa unda nan ta para y ki nan por spera den e proximo periodo.

   “Un aña cu un ruta importante ta cera, sin un plan visibel y sin comunicacion, ta pone e bario den un posicion dificil,” Parlamentario Xiomara Maduro ta expresa.

   E yamada di e bario ta simpel: claridad, accion, y un solucion pa e problema cu ta dura hopi tempo caba.