Parlamentario Clifford Heyliger di Fraccion di AVP
ORANJESTAD (AAN) -- Parlamentario Clifford Heyliger, di Fraccion di AVP, den entrevista cu Matutino DIARIO, a duna di conoce cu Diamars di e siman aki nan tabata tin un reunion cu San Nicolas Business Association, tocante vivienda y ayera nan a papia di energia.
Pero e Comision ta Comision di Finanzas y eigenlijk e tema no ta regarda nan. El a enfatiza cu Parlamento tin reglanan pero Partido MEP ta un di nan cu cada bez ta papia di regla, cu mester cumpli cu ordo, pero awo mes nan ta desviando di esaki.
El a splica cu berdad ta cu tin comisionnan cu tin temanan cu ta toca otro, y normalmente e presidentenan ta papia hunto y ta forma un “joint-venture session”, sinta hunto y trata e tema. E parlamentario a bisa cu esey a pasa cu Finanzas y Energia, y Finanzas cu Turismo, y no ta nada straño cu esey ta sosode. Pero ora den comision bo ta bin cu temanan cu ta regarda otro comisionnan bo ta bezig ta bypass e sistema, segun e Parlamentario a señala. Esaki pasobra e ora ey tin un wega politico cu ne.
Heyliger a indica cu Parlamento tin un sistema, tin un proceso, anto nan tin cu mantene e proceso ey. Si nan kier ta honesto cu nan mes cu wak e proceso, si enberdad bo ta boga pa e bienestar di Aruba.
El agrega cu den siete aña nada a wordo haci cu e refineria, nan mes a cer’e, y awo e ta na werki y e ta kere cu mester desmantel’e parcial of totalmente.
