Eduard Pieters di Partido PPA:
ORANJESTAD (AAN): Eduard Pieters, di Partido PPA, den conferencia di prensa tocante e tema di e lucha di maestronan pa gobierno drecha nan posicion salarial, y pone atencion na e proposicion cu SIMAR a trece riba mesa, na aña 2023, pero nada a sosode, a indica cu PPA tin un suplica, y el a papia cu e lider di nan Fraccion caba, pa haci algo riba esaki, y como Parlamento, yama kizas un vragenuur y haci preguntanan na e minister.
“Nos ta carga speranza cu nan ta bay contesta nos preguntanan pasobra nos ta ripara ultimo añanan cu un of dos minister ta contesta pregunta, pero e otronan no ta contesta pregunta. Nos a compromete cu Sindicato SIMAR, cu nos lo sigui lucha y vigila e proceso aki, hopi di cerca.
“Nos a compronde cu nan lo tin un reunion cerca gobierno na final di otro siman, y nan a invita e miembronan tambe pa bin na Bestuurskantoor pa haya informacion di biaha, kico a pasa cu e reunion eynan”, Eduard Pieters a señala.
El a subraya cu Partido PPA ta sostene, e canalnan ta habri y pa loke ta den Parlamento PPA tin e posicion unda cu nan por haci preguntanan, nan por yama e minister en cuestion pa responsabiliza su mes, y tur esaki na beneficio di e maestro y muy particular, y muy specialmente, pa nos muchanan. “Pasobra, nan merece miho. Un maestro contento, un mucha mas, contento den e klas”, Eduard Pieters a enfatiza.
