Parlamentario Shailiny Tromp-Lee:
Esaki ta mina democracia di parlamentario y ta contra proceso di transparencia describi pa IPKO
ORANJESTAD (AAN): Riba e tema di Rijkswet HOFA, Parlamentario Shailiny Tromp-Lee a informa cu Gobierno di Aruba, no tawatin y ainda no tin consensus di Parlamento riba e ley aki. Despues cu Fraccion di AVP a pidi pa schors e reunion den Parlamento casi tres siman pasa pa duna nan tempo pa bay lesa y analisa e documentonan, ainda e reunion no a wordo yama bek pa trata e topico aki den Parlamento.
E reunion aki, Parlamentario Tromp-Lee a remarca, a ser pidi door di Fraccionnan di MEP y PPA 7 luna pasa. E peticionnan, 5 total, tawata pa Gobierno duna aclaracion y mantene tambe e pueblo di Aruba informa.
“Pa sorpresa di henter Parlamento, dia cu e reunion aki a wordo yama porfin 29 di augustus ultimo pa despues keda geschors, Gobierno AVP-FUTURO a bin duna e informacion cu nan a bay di acuerdo cu e contenido di e Rijkswet caba y cu esaki a keda presenta na Conseho di Minister di Reino caba y tawata riba agenda pa ser trata e dia ey mes, dia 29 di augustus, den Conseho di Minister di Reino na Hulanda”.
Ironia di bida, segun Parlamentario Tromp-Lee, ta cu na e momento ey, e dia ey menciona, cu Parlamento tawata den reunion pa trata esaki, e concepto Consensus Rijkswet, supervision financiero pa pais Aruba a keda trata na Hulanda y a duna luz berde pa cuminsa cu internet consultatie.
Pero loke ta condenabel ta, e Parlamentario ta sigui bisa, ta e hecho cu ful e proceso aki a tuma luga sin cu Gobierno a informa Parlamento di Aruba riba e contenido di negociacionnan cu tawata andando. Mientras cu riba 29 di augustus, Gobierno a confirma na Parlamento cu nan a entrega e concepto Consensus Rijkswet pero nan a lubida di bisa cu ya el a wordo trata y aproba caba.
Pero, loke pueblo mester condena ta, cu Gobierno no a involucra Parlamento y tampoco tawata tin consensus di Parlamento di Aruba di acuerdo cu e regla stipula entre Parlamentonan di Aruba, Corsou, Sint Maarten y Hulanda.
“E proceso aki, pueblo mester realisa cu ta inaceptabel y inhustificabel. Pasobra no solamente Gobierno a mina e democracia Parlamentario, pero tampoco nan a mantene nan mes na e proceso describi na aña 2022 pa IPKO caminda ta poni bon cla cu gobiernonan mester un proceso transparente envolucrando Parlamento na unda claramente ta para cu Gobierno mester tin consensus di Parlamento.
Esaki no ta e situacion actual pa loke ta trata e Consensus Rijkswet HOFA”, Parlamentario Shailiny Tromp-Lee a enfatisa.
