Parlamentario Jennifer Arends-Reyes:
ORANJESTAD (AAN): Lider di fraccion di AVP den Parlamento, Jennifer Arends-Reyes, recientemente a pidi atencion special riba motibo di celebracion di Dia Internacional di Democracia. Den conferencia di prensa, el a trece un mensahe cla: Aruba mester para keto y refleha riba cierto politico cu tin den Parlamento y e rumbo cu nan kier hiba debate y representa pueblo.
Arends-Reyes a enfatisa cu democracia no por existi sin un base di respet. Parlamento ta e espacio caminda partidonan politico cu diferente punto di bista ta topa, y ta natural cu debate ta intenso. “Pero ora cu debate ta bira insulto y menasa personal, nos ta perde di bista e esencia di democracia,” segun e lider di fraccion.
El a expresa preocupacion tocante di lenguahe hostil cu ta uza, tanto den sala di parlamento como riba media social. Segun Arends-Reyes, e falta di respet y palabra ofensivo ta yega hopi leu.
“Esaki no ta e caminda cu Aruba kier hiba su politica, ni menos yega na division extremo. Como lider bo tin un responsabilidad tambe pa e pueblo cu ta sigui bo. E mensahe cu nos ta manda mester ta di respet y di dialogo constructivo,” Arends-Reyes a bisa.
Reflehando riba e inauguracion di aña parlamentario, Arends-Reyes a conta cu ex-politiconan a cambia e experiencia di un epoca diferente, caminda cu a pesar di divergencia, nan tabata por sinta y papia cu otro, y hasta mantene un amistad. “E contraste cu nos ta mira awe ta preocupante. Politica ta bira cada biaha mas polarisa, y esey ta fomenta odio y desunion den pueblo,” el a indica.
E lider di fraccion di AVP ta rechasa categoricamente insulto y descalificacion cu ta tira contra parlamentario, incluyendonan pa esunnan cu ta nobo den e politica. Ora bo ta yama un colega ‘bobo’, ‘traidor’ of otro tipo di palabra denigrante, no solamente bo ta ofende e persona, pero bo ta manda un mensahe robes na hubentud y comunidad henter,” el a agrega.
Arends-Reyes a finalisa su mensahe cu un apelacion na pueblo y na tur politico: “Recientemente nos a celebra Dia Internacional di Democracia. Ban mustra cu Aruba por hopi mas miho: como un pais civilisa, cu un pueblo educa y cu nos hubentud ta sigui nos. E respet mester bira central den tur debate, paso solamente asina nos por sigui fortalece nos democracia.”
