Parlamentario Xiomara Maduro:
ORANJESTAD (AAN): Partido FUTURO a priminti Pueblo cu nan lo traha na manera transparente y tambe honesto pa Pueblo. Apenas un par di luna den gobernacion, e decepcion ta bisto den Pueblo. Ningun Minister of Parlamentario di FUTURO ta transparente of honesto cu Pueblo, ya cu ningun kier bisa ta dicon Partido FUTURO ta bende Aruba su libertad pa un sakito di placa.
Ministernan no ta sincero
E Ministernan Gerlien y Geoffrey di FUTURO ta laga hopi di desea pa locual ta transparencia y honestidad. Riba e topico asina importante pa Aruba manera e Rijkswet HOFA y nos derecho pa dicidi pa nos mes conforme Aruba su status autonomo den Reino Hulandes, nan ta demasiado keto. Nan TUR dos ta core pa e debate den Parlamento. Riba nan mes tampoco nan ta splica e Rijkswet HOFA pa Pueblo por sa ta kico ta den wega. TUR dos a prefera bay den e show di merdia na radio pa bruha tera cerca moderadornan cu no tin conocemento pa cuestiona nan falta di contenido y sinceridad cu Pueblo.
Parlamentario tampoco tin contenido
Den Parlamento tambe e Fraccion di FUTURO ta zwak den politica y den contenido. Ningun di e tres Parlamentarionan di FUTURO por hustifica e procedura hiba y tampoco por splica e contendo di e Rijkswet HOFA. Tur ta uza e argumento fofo cu Evelyn a firma caba, pero ningun por splica kico Evelyn a firma y kico nan lidernan Gerlien y Geoffrey a bay de acuerdo cune. Mas preocupante ta, cu ningun por splica con e ley di Reino aki lo funciona den practica y kico esaki lo significa pa Pueblo di Aruba.
FUTURO ta bende Aruba pa un sakito di placa
E ta ironico cu net un partido yama FUTURO cu den su prome salida ta haya 3 asiento di confiansa di Pueblo, ta presta su mes pa entrega e autonomia y pone futuro di e Pueblo aki den man aheno. E ta bisto cu e ministernan di FUTURO ta pusha pa bende e autonomia di Aruba pa un sakito di placa pa haci inversion y despues sali gaba cune. Mas tristo ta, cu FUTURO a haci esaki manera un ladron di anochi, scondi pa Pueblo no haya sa. Anto e traicion aki ta bin di hendenan cu a priminti pa ta transparente y honesto cu Pueblo. Ki decepcion!
