Rocco Tjon na Minister Gerlien Croes:
ORANJESTAD (AAN): Departamento di Mucha y Hoben (DMH) a nace despues di añanan di trabao intensivo, critico y investigativo, cu e meta pa yuda y proteha nos mucha. Manera ta conoci DMH ta e departamento cu ta administra y supervisa centronan di cuido di mucha, y ta un partner crucial den e cadena social, hudicial, enseñansa y salubridad publico. DMH su rol ta fundamental pa garantisa centronan di cuido di calidad, sigur (safe), cu personal adecua y bon ekipa y tambe DMH ta yuda traha preventivo contra abuso di mucha.
Pakico DMH ta asina importante pa pueblo: Cu e cierre di DMH, abo como mayor of voogd ta perde tur e centronan di cuido for di bista. Bo ta perde e confianza den e calidad di cuido cu bo yiu lo por ricibi. DMH a percura pa brinda curso na tur centro di cuido riba diferente tereno manera: EHBO (prome auxilio), Señalnan di Abuso, brinda opleiding riba MBO niveau conhuntamente cu Gobierno di Aruba, a percura pa tur centro di cuido ta limpi (higiena), sigur (pensa riba siguridad ora tin candela of calamidad), y mas.
Señora Gerlien Croes no a solamente cera un departamento, pero tambe el a cera e porta pa colaboracionnan cu e personal a traha duro pa logra. Colaboracionnan internacional manera UNICEF y Universidadnan na Hulanda, como tambe colaboracion den e aparato gubernamental mes manera polisnan di bario.
E impacto di esaki ta directamente riba bo. E ta directamente riba bienestar di nos muchanan. Centronan di cuido a hinca placa, tempo y energia pa logra cumpli cu e standardnan internacional pa centronan di cuido di mucha y awo Gerlien Croes a tir’e den bari manera un papel mas. Placa y confianza di comunidad a worde tira afo. Sin conta con tur e programanan, protocol, training y partnership cu Hulanda (Unicef) ta keda colga den aire.
Conclusion: Cera un departamento cu tanto balor strategico ta mustra un falta di seriedad di Minister Gerlien Croes pa un topico asina delicado: proteccion di mucha. E hecho cu e proyecto aki a cuminsa bou Gabinete Wever-Croes no por pisa mas cu e hecho cu nos muchanan merece tur proteccion y cu nos centro di cuidonan tambe merece e respet pa nan trabao y dedicacion.
Pa finalisa, esaki ta mustra cu sra Croes ta yega tuma decision sin dialoga cu stakeholders, pasobra un decision cu asina hopi consecuencia negativo hamas lo por a conta cu un conseho positivo. Nos ta spera cu e por sali duna un splicacion duidelijk cu argumento pakico el a tuma e decision aki y no simplemente haci un post riba Facebook mane nada no a pasa!
