ORANJESTAD (AAN): Riba Dia di Betico, Movimiento Electoral di Pueblo (MEP) hunto cu Fundacion Betico Croes
a haci un ofrenda floral na memoria di nos lider inmortal y arkitecto di nos libertdad, Betico Croes, na Plaza Status Aparte den curason di Santa Cruz.
Pa e momento special aki Parlamentario Xiomara Maduro a hiba palabra den nomber di MEP pa asina recorda Betico Croes su lucha pa awe nos por tin nos Status Aparte den Reino Hulandes. Un representante di Fundacion Betico Croes a hiba palabra tambe pa splica mas di nan meta pa conserva e memoria di Betico Croes bibo a traves di actividadnan cu lo wordo organisa na e Plaza Status Aparte cu ta Betico su logro di mas grandi pa Aruba.
E acto a conta cu presencia di e unico ruman di Betico na bida, sr. Hendrik Croes, cu a comparti un anecdota di e lucha di Betico pa logra Aruba su Status Aparte. Presente tambe tabata ex minister sra. Ella Tromp Yarzagraay y algun simpatisante cu semper tin Betico den mente y curason. Special tambe tabata e presencia di un grupo di turista di cual uno tabata un di e nursenan cu tabata trata na e Hospital na Utrecht, Hulanda, na unda Betico tabata interna y despues a fayece.
Betico Croes ta e arkitecto di e libertad di Aruba, e lider inmortal di Movimiento Electoral di Pueblo, y su memoria ta sigui bibo den mente y curason di nos tur, tabata palabranan expresa pa Parlamentario Xiomara Maduro na e ocasion bunita aki.
