Parlamentario Xiomara Maduro:
ORANJESTAD (AAN): Den antesala di e celebracion di Dia di Betico, Minister di Labor Wendrik Cicilia di AVP a decreta un dia liber cu ta contra Aruba su leynan di labor. E anuncio di e decreto ministerial di Minister Cicilia (MB) a crea hopi confusion den comunidad. Como cu e MB ta contra ley, Minister Cicilia a haye ta “trek in” su MB, y e mandatario mester a bay den conferencia di prensa pa corigi esaki.
Lamentablemente Minister Cicilia den e conferencia di prensa aki, enves di a admiti su gran eror di principiante, a scohe pa expresa su mes di un manera hopi baho di tur MEPista, pa asina defende su mes y purba scapa cara. E mandatario a haya ta bon pa bisa: “Oponentenan politico specificamente di MEP cu no por lesa, cu no por wak mas leu cu nan nanishi, cu tin deficiencia den inteligencia y capacidad, cu no tin conocemento y cu aparentemente no por lesa Hulandes, ta suministra informacion incorecto den nos comunidad. Ta algo cu ta irita y indigna mi te den mi weso.” Cu otro palabra Minister Cicilia a yama tur MEPista pa hende bobo y bestia cu no sa con pa pensa, ni lesa drechi.
E ta inaceptabel cu un mandatario cu ta haci fout y crea tanto confusion den comunidad, riba dje ta bay baha su gal y ofende tur MEPista. Minister Cicilia debe Pueblo y tur MEPista un despensa pa e manera no profesional y sin etica cu el a expresa di nan na nos planta nacional Telearuba. “Sigur na vispera di Dia di Betico, arkitecto di nos libertad y lider inmortal di Movimiento Electoral di Pueblo, un “mucha manda” no por bin ofende MEPistanan di e manera baho aki. Si bo a haci fout, para pa bo cos, pero no bin ofende e MEPistanan,”Parlamentario Xiomara Maduro ta expresa.
Esnan cu kier mira y scucha pa nan mes locual Minister Cicilia a expresa di tur MEPista por mira e conferencia via e link: https://youtu.be/S9-azWssUeI
