Stoof a causa candela den apartamento lagando un persona cu kemadura

ORANJESTAD (AAN):   Diaranson merdia rond di 1’or polis y diferente unidad di Brandweer a sali pa un alarma di candela den cas.

Segun polis, no tabata facil pa a haya e adres, pero na yegada di Brandweer nan a topa cu un candela den un cas, aparentemente na un apartamento na Wayaca.

Den incidente aki un persona a sufri kemadura na su man y a ricibi asistencia medico inmediato. Paramediconan cu a yega na e sitio a duna e persona herida atencion di prome auxilio.

Brandweer a logra domina e candela den algun minuut, despues nan a sigui cu e pasonan necesario pa asegura e area.

Investigacion preliminar ta mustra cu e candela a origina riba un stoof, posiblemente despues cu un obheto a keda lubida riba dje. Esaki a causa cu e candela a plama den e apartamento, causando basta daño material.

Elmar y DTI tambe a wordo pidi na e adres pa haci control y inspeccion.