Ford Ecosport a pega candela mey-mey caminda

ORANJESTAD (AAN): Tabata Diahuebs anochi cu autoridadnan a ricibi yamada, cu riba caminda di Montana pa Sabana Blanco, 

tin un auto na candela.  A ricibi informacion cu esaki ta poco pazuid di Pacifico Restaurant na Dakota.

   Tanto Polis y Bombero a mobiliza pa eynan.  Ora cu a yega, a bin topa cu un Ford Ecosport tur na vlam.  Ocupantenan ya tabata pafo.  Ora cu Bomberonan a yega, no por a haci mucho mas, y por a djis paga e candela, pa despues kit’e for di riba caminda.

   For di declaracion, a compronde cu e candela probablemente a cuminsa den e motor y esaki a expande hopi rapido, lagando e famia sin auto.

   Polis por a ser mira ta tuma dato y mester a warda takelwagen yega pa bay cu e auto.