Otro auto a bolter e biaha aki riba acera na Ponton y chauffeur a keda leve herida

ORANJESTAD (AAN) Diahuebs merdia a sosode un accidente unda tres auto tabata envolvi y

un di nan a bolter kedando mitar di dje riba acera na Ponton, dilanti di Hua Run Supermarket.

  Loke a pasa ta cu e persona tras di stuur di un Mini Cooper no a controla su velocidad na tempo y a dal hopi duro patras di un Suzuki Swift, e impacto tabata uno hopi fuerte, cu a pone cu e Mini Cooper a bay bolter. Mientras e Suzuki Swift den e impacto fuerte a bay dal contra e auto cu tabata su dilanti.

  Polis a presenta na e lugar y tambe a pidi pa presencia di ambulance. Na yegada di ambulance. e paramediconan a haci un control medico cu ambos chauffeur, pero no tabata haya necesario pa transportanan pa hospital.

   Ora un unidad di Arubus cu pasahero a pasa dilanti di e suceso, un par di hende a reacciona, y a punta “kico ta pasando cu e trafico na Aruba? Di con asina lihe autonan ta bolter? Kico ta pone chauffeurnan perde control?

   Den e caso aki no tabata tin victima, pasobra a mira cu e chauffeur di e auto cu a bolter a worde trata pa personal di ambulance, pero no mester a bay hospital cu ne.

   Kico ta e motibo no ta conoci pa DIARIO, pero enberdad algo no ta bon. Cada bez tin accidentenan di auto, y lamentablemente tin biaha cu resultado fatal, manera esun reciente dilanti di Aruba Bank.

   Un ciudadano a yama DIARIO y a comenta cu Diahuebs mainta otro auto a bolter na Camacuri, drenta riba tereno di Aruba Bank y bay bolter den e rooi. Via telefon un ciudadano a comenta y tambe a mustra hopi preocupacion, pasobra Aruba ta un isla asina chikito, y tanto accidente ta sosode. Hasta el a bisa cu el a haya miedo di core riba e caminda di Camacuri.

   Esaki ta un tema cu mester capta atencion completo di gobierno, Parlamento, comunidad en general y claro autoridadnan di transito. E situacion no por sigui asina, no obstante no den tur caso tin perdida humano, perdida material ta halto y con cu bay tin problema ta keda atras, fuera di e parti di trauma emocional cu e accidentenan aki ta ocasiona, susto pa famianan, y temor pasobra tin hopi ta sinti cu trafico ta birando cada vez mas insigur riba nos pais.

   Por fabor, automobilistanan, ban uza bon tino y consenshi riba tur caminda pa evita dañonan riba hende y material, riba nos careteranan.