Motociclista di Bonaire a keda herida den accidente di trafico na Meiveld

ORANJESTAD (AAN): Diabierna anochi banda di 7:00 pm, Central di Polis a manda unidad di patruya di Santa Cruz,

como tambe Ambulans pa e caminda di Meiveld, un poco mas pabou di e T-weg banda di Hua Ling Food Center, pa un accident serio entre motorcycle y un vehiculo tipo SubCompact Crossover SUV.

   Polis a yega, y a nota cu e accident a socede como 60 meter pabao di e T-weg, y esaki ta mas bien dilanti un otro negoshi, esta Wan Jua Le Supermarket di Meiveld.

   Aki a bin haya un SUV color shinishi Nissan Kicks y un Suzuki Motorcycle cu bandera di Bonaire pega riba dje.  E motorcycle aki a yega for di Bonaire pa participa na e di 27 evento anual di ‘Flag Rally 2024’ organiza pa Camacuri Harley Davidson Club, y e anochi ey nan tin un actividad di ride cu lo a finalisa na Sport Boys.

   Riba caminda, e motociclista tabata benta di banda cu su helm bisti, pero cu multiple golpi na su curpa.  Boluntarionan tabata yuda mantene su cabes stabil pa e no move, y tabata bise pa no move en espera di Ambulans.

   Testigonan a splica Polis, cu e Nissan Kicks a sali di Wan Jia Le Supermarket subiendo caminda pa bay direccion robez, mientras cu e motorcycle tabata acercando for di pariba.  Nan a mira con e motociclista a trata na hala mas na su man robes, pero envano y a dal duro contra e banda di chauffeur. 

   E impacto na e porta di e Nissan Kicks tabata fuerte, y den e vehiculo tabatin un dama 7 luna na estado y e tambe mesora a cuminsa haya hopi dolor.

   Paramediconan cu a yega, cu a ayudo di esnan rond a yuda pone e motociclista ariba e brancard, y hib'e na e ambulance unda cu a sali cu ne despues pa Hospitaal.  E dama tambe a ricibi atencion medico.

   Polis di trafico tabata presente y tambe a nota presencia di Alto Comisario Ramon Arnhem, kende a pone su mes na altura di e sucedido lamentable aki.  Palabra di pronto recuperacion na ambos persona herida.