Impacto fuerte na Savaneta a costa bida di motociclista di 20 aña

Dia di Himno y Bandera a cuminsa tristo

• Maximilian Hernandez Pinedo ta e di 2 morto den trafico
• Chauffeur burachi di Nissan March a keda deteni 

ORANJESTAD (AAN): Dialuna marduga pa exactamente 4:40 am Central di Polis a ricibi yamada di un accident pisa cu a caba di socede riba caminda di Playa pa San Nicolas, na altura di Savaneta a wordo informa di un accidente serio ariba e caminda di Savaneta, altura di e edificio blauw bandona cu tabata ex-Domino's Pizza panort di caminda.

   Prome informe di unidad tabata cu un Nissan March color blauw marino a dal contra un Mack Truck di Ecotech.  Pero den algun seconde nan a mira en realidad kico a sosode, y cu tin un brommer envolvi y esaki a keda destrui den tres pida.  E victima mes ta benta como 55 meter mas pabao, net pariba di e edificio blauw di ex-Domino’s Pizza.

   A core pidi presencia mas urgente di Ambulans pa e victima.  Ora cu Ambulans a yega, paramediconan a bin nota cu e victima hoben eybao no tin señal vital mas.  Aki mesora Polis a pidi presencia di autoridadnan halto, y Centro di Alarma a bay busca un Docter pa bay eynan.

  Testigonan a splica: Na e lugar di accident, a compronde cu e Nissan March color blauw cla cu number A-50141 aki tabata bini di pabao y ta direccion pariba pa San Nicolas.  Net su dilanti tin un Mack Truck di e compania EcoTech ta coriendo tambe direccion pariba.

   Chauffeur di e Nissan March a dicidi cu e ta bay pa pasa e truck di Eco Tec cu tabata bayendo pariba.  For di banda di Winter Garden Supermarket el a prepara pa bay pasa e Truck.  Sinembargo como cu e Nissan March aki ta uno di right hand drive (stuurwiel ta banda drechi), e chauffeur no tin e bista completo pabo bay pasa un vehiculo grandi bo dilanti sin tin peliger, y sin bista suficiente di trafico cu ta bin di direccion contrario.

   Y net aki e motorcycle Suzuki tipo Sport Bike color preto cu number MFA-2664, cu tin extension (‘zweefarm’) instala pa e wiel ta mas patras tabata bin for di pariba y cu velocidad halto.  Resultado ta cu den un fraccion, nan a dal frontal riba otro banda di e edifcio blauw di ex-Domino’s Pizza.  E motorcycle a kibra den 3 pida y spat tur rond, y e manehador den e momentum di impacto a bay finalisa panort di caminda net patras di un Parada di Bus cu tin eynan.  Partinan di e motorcycle a finalisa dilanti e cas Savaneta 105-B panort di caminda.  E Nissan March a finalisa dilanti Home Fun Super, y e Truck a stop net na e T-weg cerca di Mentor Barbershop.

   E tanki di gasolin di e motorcycle a tambe a zwaai y kita, y a pega candela.  E tanki di gasolin a keda lora y pa colmo a bay dal y kibra un meter di awa, pues Polis mester a notifica WEB Aruba NV tambe pa bin drecha esey.

  Debi na e candela, a pidi pa unidad di Bombero bay eynan pa atende e tanki di gasolin na candela.

   Dal den Truck tambe: Durante di e impacto cu e motorcycle, debi na e momentum di golpi fuerte, e Nissan March a bay dal parcialmente contra e Truck di EcoTech.  Chauffeur di e truck a sinti algo dal y despues di un rato a mira e tanki na candela pasa bay. Ya e momento ey tur e desaster a pasa patras.

   Den e Nissan March tabatin 4 persona, y Paramediconan a duna nan asistencia eynan mes, pues no mester a hiba nan Hospital.  Pero e vehiculo a ricibi basta golpi mes y daño material.  Net den parkinglot di Home Fun Super tabatin un Snacktrailer cu e momento ey tabata habri ainda y tur hende eynan a mira loke a socede.

   Detene e chauffeur:  E chauffeur di e Nissan March tabata mustra di ta bebi, y agentenan a bay puntre si e ta coopera cu un investigacion preliminar di su rosea, manera ta stipula den Articulo 24 inciso 1 di Ley di Trafico.  Polisnan a bisa e chauffeur, cu si e nenga di haci esey, automaticamente e ta bira un infraccion y e lo wordo aresta.

   Pa nan sorpresa, e hoben chauffeur a nenga di coopera cu Polis y no kier a supla pa e Alcohol Test.  Esey tabata suficiente motibo pa el a wordo aresta pasobra a viola Articulo 5 inciso 2.   El a wordo hiba cu vehiculo di transporte pa Warda di Polis na San Nicolas, unda Fiscal Auxiliar a duna ordo pa e keda encarcela pa mas investigacion.

   Pa 5:30 am, Dr. Texier a constata morto di e hoben Maximilian Thomas A. Hernandez Pinedo, naci dia 4 April 2003 na Aruba, pues tin 20 aña di edad.

   Specialista di Trafico di Cuerpo Policial tambe a yega, hunto cu e ekipo forensico di BFTO pa documenta henter e accident. 

   Famia di e victima tambe a yega y tabata un momento duro, y nan a aglomera dilanti e parkinglot di e empresa di Home Fun Super.  Bureau Slachtofferhulp a sa di trata cu nan.  Shersh di Funeraria a presenta pa lanta e restonan mortal di eybao.

   Cu e accident aki, Maximilian Hernandez Pinedo a bira e di 2 victima di trafico insigur pa 2024 riba e isla.  E ta un hoben cu pasion pa deporte di motor.  E ta biba na Tarabana y ultimo tempo tabata traha na Renaissance Aruba Resort.  Na su famia y amigonan, DIARIO y Cuerpo Policial ta extende su mas profundo palabra di condolencia.