Homber na Pos Abao a ricibi 3 impacto di bala den pecho

Pueblo a reacciona furioso cu Polis ta trigger-happy

• Famia tabata roga pa nan mes trankiliza e persona
• Cuestionando proceder na clinica Respaldo 

ORANJESTAD (AAN): Reaccion den pueblo despues di e tiramento di Diamars atardi na Pos Abao tabata uno cu a bolbe tira culpa riba Polis cu enbez di a busca un strategia di calma un persona completamente y sigui conseho di famia, a bay over pa uza e ultimo recurso disponibel di tira un hende mata.

   Casonan similar: Esaki ta algo cu a yega di socede hopi biaha den historia na Aruba!  Por corda un famoso caso na Rooi Koochi, unda un famia a yama Polis pa pidi nan yuda trankiliza nan yiu homber.  Esaki a finaliza fatal ora cu Polis a tira e hoben.  Famia di e tempo ey ta lamenta cu nan a yama Polis.

   Tambe e caso na Sero Pita par di aña pasa, unda famia a yama Polis pa purba na trankiliza nan tata cu a yega cas burachi.  Esaki a finaliza fatal ora cu Polis a tira e homber.  Famia e tempo ey tambe a lamenta despues cu nan a yama Polis.

   Awor tin e caso di Frank Miguel Henriquez, kende Diamars atardi poco despues di 3:00 pm a ser tira na su cas na Pos Abao.  Ya caba DIARIO a trece den edicion di Diaranson e prome informe di testigo y Polisnan.

   Den e relato aki, ta trece opinion di famia di loke a socede.  Nan ta splica cu Frank Henriquez tabata un persona rustig y semper alegre cu stima su mama inmensamente.  E ta gusta hasta bay live riba Facebook, ta canta y papia cos kens.  Semper Frank tin nan como famia ta hari.

   Respaldo a lage bay cas: Famia a splica cu Diamars 27 di Januari 2026, e instancia di Respaldo a yama e mama di Franklin y a informe pa e presenta na clinica numa, y pasa busc’e pa bay cas.  E mama a bay na clinica di Respaldo pa busca Frank di 36 aña di edad.  E mama a puntra eynan, unda e Docter ta pa asina por firma pa e sali.  Nan a bise, cu tur cos ta OK, pa e sali numa.

   Pues e dia ey, Frank a regresa cas hopi contento di por a mira su Mama bek.  Na cas el a bisa cu e tin hamber, y mesora su mama a ofrece pa prepara cuminda.  Su contesta: “No mama, mi mes ta hasa mi galiña”.  Frank a bay sinta bao palo patras den cura, y a huma su cigaria.

   A resulta cu despues di 2 ora, personal na Respaldo a bin ripara cu nan a comete un eror, y no mester a laga Frank sali bay, debi cu no a firma.

   Asina e FACT-Team di Respaldo a bay busc’e na su cas na Pos Abao, y a escala e situacion y pidi Polis asistencia.

   E tin miedo di Polis: Famia a splica cu Polis a yega y drenta cas, comosifuera nan ta manda.  Frank cu ta pashent di Respaldo ta conoci como un persona cu tin hopi miedo di Polis.  E mama y sobrina di Frank sa esaki bon, y ambos tabata presente e momento ey.  Ta asina cu den pasado, semper ora cu Frank a bay Respaldo, ta den Ambulance ta bay cu ne, y ta dun’e remedi pa e por calma.

   E biaha aki na forma autoritario a keda pusha cu Frank mester regresa, y “mester bay bek awor”. Claro cu el a caba di sali di e clinica, y e no ta compronde di con e mester bay bek y e no kier bey bek.  Aki su mama y sobrina a keda sugeri y suplica Polisnan pa djis lag’e na pas un rato.  E mama a despues a hasta bisa nan, cu no worry, e mes ta hibe bek.  Pues a trata di de-escala e problema.

   Sinembargo pa nan sorpresa, Polisnan a keda insisti cu nan ta manda den e cas y nan ta bay cune e ora ey mes.  Frank cu ta pashent di Respaldo a spanta paso e tin miedo pisa di Polis.  Den su desesperacion e ora ey el a gara un cuchiu y a para cu ne den su man.  Polisnan a saca nan arma.

   Nurse a keda keto:  Tin di remarca cu e momento ey un nurse masculino di Respaldo tabata presente.  Si e nurse aki sa con ta atende Frank, di con e no a trata di sikiera papia y calma nan pashent.

   Mama di Frank a bay para banda di dje y roga Polisnan pa baha nan arma, y cu e mes lo hib’e.  E sobrina a bisa mesun cos tambe pa nan hala leu y laga Frank calma.

   “Pero Polis tin trigger happy fingers loco pa mata y tire no 1, ni 2, pero 3 bala den su pecho.  No a tire na pia, pero den su pecho cu su mama para banda di dje.  E mama mes a hera haya bala.

   Famia no a keda nada contento con e storia a plama.  Nan a indica: “Asina KPA kier bin sinta gaña y tapa pa nan colega color blanco cu barba largo!  Esakinan ta suppose di proteha pueblo?”

   Famia a finaliza bisando: “Polis a mata Frank Henriquez!  Dios ta grandi y Dios ta bon! Cu awor Franklin por sosega dushi asina hunto cu su madrina den brasa di nos Creador!”

   Pakico no a tira na pia: Hopi reaccion a ser duna riba loke a socede aki, y hopi ta boga pa bin cu cambio drastico den forma di proceder.  Tin hopi tambe ta opina cu tin di investiga di con protocolnan a keda casi no-existente na clinica di Respaldo mes, unda ta laga un pashent bay cas y despues ripara cu ta eror.  Aki tin algun persona cu a comenta cu culpa ta cay riba personal, y otronan ta tira e culpa riba reduccion di presupuesto aloca na Respaldo cu ta trece e domino-effect riba tur cos.

   Ciudadanonan ta keda puntra nan mes, di con no ta purba na tira prome na pianan di e persona pa asina evita cu e situacion ta escala te cu e ta ocasiona morto?  Di con no ta uza arma cu proyectil di rubber pa casonan no-lethal.  Pakico a stop cu e prueba cu bodycam di Polisnan.  Ta bolbe corda e casonan famoso di Rooi Koochi y Sero Pita y mas recien tambe di e hoben special Ayden Lanoy na Februari 2025 na Madiki Kavel.

   Awor e caso ta bao investigacion di LandsRecherche, y ohala cu esaki wordo haci cu interogacion di tur hende envolvi, y scucha testigonan pa asina Ministerio Publico por tuma un decision corecto den e caso aki.