Altocomisario Arnhem ta pidi comunidad pa mantene trankilidad
- Pa nos tur haya claridad investigacion LandsRecherche
ORANJESTAD (AAN): “E ta duelmi hopi pero ban mantene trankildad y laga e investigacion cana su caminda”. Esey ta en corto e declaracion di Altocomisario Ramon Arnhem di Cuerpo Policial, referente e incidente tragico cu a socede Diamars atardi na Pos Abao.
“Ayera a tuma lugar un incidente lamentabel. Mi coleganan tabata involucra den un incidente di tiramento na unda un persona lamentablemente a fayece na Pos Abao. Un situacion dificil cu ambos partido a wordo afecta negativamente,” ta loke Arnhem a indica.
Altocomisario a sigui bisa: “Pa un mayor y famia perde un yiu den un forma repentino ta inexplicabel y ta haci hopi dolor. Na niun momento mi coleganan ta sali for di cas y bay labora pa hayanan mes den un situacion asina aki. Nos niun kier pa e situacion termina di e forma aki. Mi ta biba cu nos comunidad mescos cu mi coleganan cu ta ainda ta den shock pa cu e incidente encuestion.”
“Como altocomisario e ta hacimi dolor cu nos ta envolvi den un situacion asina aki cu ta impacta nos comunidad. Mi sa tambe cu tin hopi pregunta, hopi dolor y hopi persona kier sa kico a pasa. Pa nos tur haya e claridad e investigacion ta den man di Landsrecherche bao liderazgo di Ministerio Publico. Nan lo percura pa investiga e caso aki paso na final di dia tur partido envolvi por haya claridad mescos cu a nos.”
El a bisa cu debi cu e investigacion awor ta den man di Landsrecherche tur pregunta tin cu wordo dirigi pa Ministerio Publico. “E no ta facil pa nos tampoco y mi ta lamenta locual a sosode tanto pa e victima su famia pero tambe pa e agente policialnan cu tabata envolvi.”
“Mi ta manda palabra di condolencia y forza na e famia di e fayecido. Tambe hopi forza na mi coleganan envolvi cu pa nan tampoco e no ta facil den e momentonan aki, mi lo percura pa nan tambe haya e sosten necesario.”
Altocomisario a finaliza bisando: “Un mensahe mi tin na nos comunidad pa ban mantene e trankilidad y e investigacion ya caba ta canando su caminda”.
