‘Calidad di bida den centro di Oranjestad ta responsabilidad di nos tur’

Altocomisario Ramon Arnhem:

ORANJESTAD (AAN): Den cuadro di e recien anuncio cu a instala un Taskforce “Convivencia: Centronan di Ciudad Sigur y Humano”, Altocomisario Ramon Arnhem a haci un suplica directo na comunidad pa enfrenta hunto e reto di calidad di bida den centro di Playa.

   Durante su declaracion, Arnhem a destaca cu e problema actual no ta uno individual, sino un reto comparti cu ta rekeri accion conhunto entre gobierno, institucionnan y comunidad.  “Nos tin un problema conhuntamente, y mi ta pidi boso awe pa un yudansa pa trata e problema aki hunto,” Arnhem a expresa.

   Segun e Altocomisario, e situacion actual den centro di ciudad ta caracteriza pa varios factor cu ta influencia negativamente riba calidad di bida. Entre esakinan, el a menciona falta di limpiesa, edificionan bandona den mal estado y presencia di persona vulnerabel sin un luga fiho pa keda, loke ta crea preocupacion tanto riba siguridad como riba e imagen di Oranjestad.

   Arnhem a subraya cu e diferente retonan aki no ta existi separa, sino cu nan ta fortalece otro, afectando no solamente e experiencia di bishitantenan, pero mas importante ainda, e bienestar di residentenan.

“E ta molestia nos como ciudadano. Nos cu ta biba aki y cu ta contribui na construi Aruba, no merece esaki,” Arnhem a indica.

   Arnhem a enfatisa cu e impacto ta bira ainda mas relevante mirando cu economia di Aruba ta depende den gran parti riba turismo, pero cu e prioridad principal ta e calidad di bida di su propio pueblo.

Como respuesta, a lanta un enfoke multidisciplinario bao e Taskforce nobo, cu ta integra diferente ministerio y instancia relevante pa atende e problematica di forma structural.

   Entre e accionnan concreto cu lo implementa lo tin: (*) Mas limpiesa y mantencion di cayanan. (*) Fortalecimento di vigilancia y presencia den centro. (*) Retiro di autonan abandona y situacionnan peligroso. (*) Atencion y orientacion pa persona vulnerabel.

   Arnhem a finalisa cu un yamado fuerte pa participacion di comunidad:  “Comunidad di Aruba, ban desde awe conhuntamente haci nos isla mas limpi y mas sigur. Ban hacie.”

   E Taskforce ta marca un paso importante den e vision di gobierno pa crea un centro di ciudad cu ta mas humano, ordena y digno pa tur.