Razzia na Sero Biento
- Den e accion tambe tres persona a keda deteni
ORANJESTAD (AAN): Sin duda alguno, danki na e trabao di oficialnan hudicial ‘bakia’ di e departamento ‘Unit Narcotica’ di Cuerpo Policial di Aruba, ta sigui logra pa tene accionnan exitoso, unda nan ta sigui dal golpi duro na e baho mundo di droga, e baho mundo di sigui distribui droga cu ta destrui mente di comunidad.
Vocero di Polis a confirma na DIARIO, cu riba Diahuebs 30 di April 2026, danki na pruebanan cu a bin ta acumulando via di investigacionnan riguroso, cu apoyo di informacion drentando via Tipline di Polis, a haya luz berde di Fiscal y Ministerio Publico pa tene un razzia na un cas na Sero Biento.
E momento ey hunto cu demas unidadnan policial, incluyendo K9 Unit, e oficialnan hudicial di Unit Narcotica a yega di sorpresa na e adres.
Aki mesora a haci un control completo den e cas, bao supervision di Ministerio Publico cu a documenta tur cos. Na e cas a bin haya 3 persona masculino, di cual dos ta naci na Aruba, y uno ta naci na Colombia.
Tur tipo di droga: Ora cu a bay listra den e cas, e oficialnan di Unit Narcotica a canta ‘bingo’, debi cu a bin haya monton di droga, di tur clase! Ta comosifuera cu ta un centro di distribucion “all inclusive” di tur droga tin eynan.
Vocero di Polis a describi e droga como “un cantidad considerabel”, y a mustra cu a bin haya monton di Cocaina, cantidad di Marihuana, hopi Ecstasy (‘XTC’), y tambe puiro di Tusi (conoci como ‘pink cocaine’) cu ta un droga sintetico.
Ademas di e diversidad di droga aki, e oficialnan di Unit Narcotica a topa y confisca un arma di candela. Aki a laga personal forensico di BFTO tuma e arma, pa asina haci test cu ne pa mira si acaso el a wordo uza den cualkier tipo di crimen riba e isla.
Vocero Policial a confirma na DIARIO tambe cu nan a bin haya den e cas aki, un suma grandi di placa cash. Esaki tambe awor a wordo confisca, bao vigilancia di Ministerio Publico.
Departamento di Unit Narcotica a demostra cu nan ta riba un trend! Nan ta sigui traha incansabelmente pa combati benta di droga y pa mantene un Aruba sigur.
Cuerpo Policial Aruba ta recorda comunidad cu si bo sa algo of a presencia algo sospechoso yama e Tipline di Polis na 111-41. Bo anonimidad ta keda garantisa.
