Accident semi-frontal riba Santa Helenastraat

ORANJESTAD (AAN): Tabata Diadomingo anochi trempan alrededor di 7:00 pm,

cu diferente yamada a drenta indicando cu riba e caminda di Ponton pa Eagle, riba Santa Helenastraat tin un accident pisa a caba di socede.  Mesora a cuminza dirigi unidadnan di Polis pa e lugar, y a pone Ambulance tambe na altura.

   A drenta informacion cu un persona ta seriamente herida.  Sinembargo ora cu e prome unidad di Polis a yega, a mira cu esey no ta e caso, pues casi no ta mira cu tin hende lesiona.

   Loke nan a bin topa cu ne ta cu un Pickup Doublecab Chevrolet S10 color preto y un auto sedan Hyundai Accent color blanco a dal semi-frontal, y e impacto a pone cada uno bay halto y spat for di otro.

   Ambulance a yega despues di un rato y Paramediconan a controla ambos manehador.  No obstante e choque fuerte, finalmente no tabata tin mester di transporta ningun pa Servicio di Emergencia na Hospital HOH.

   A haya necesario pa manda busca Polis di trafico pa e investiga e accident.  E daño material na e vehiculo Chevrolet y na e auto Hyundai ta considerabel.