Segun Francel Bernardus di SPA:
- E sumanan ta basa riba un sistema cu ta existi desde 1986
ORANJESTAD (AAN): E vicepresidente di Sindicato di Polis Arubiano (SPA), Francel Bernardus, ta pidi pa modernisa e sistema di toelagenan di Cuerpo Policial Aruba (KPA) y di Gobierno en general. Segun Bernardus, e sumanan ta basa riba un sistema cu ta existi desde 1986, ora Aruba a obtene su Status Aparte, y cu no a adapta na e aumento den costo di bida.
El a splica cu e toelage pa yiu den e departamentonan di Gobierno ta di 55 Florin, mientras cu den caso di personal di KPA cu ta traha warda, e suma ta di 180 Florin.
“E aña aki ta net 40 aña desde esaki a cuminsa y a keda asina”, Bernardus a expresa.
Segun e vicepresidente di SPA, e diferencia entre e beneficionan den servicio publico y esunnan den sector priva y otro organizacionnan ta haci cu personal ta considera oportunidadnan di trabao pafor di Gobierno. El a indica cu un oferta cu un entrada mas atractivo por ta un motibo pa un empleado bandona servicio.
“Hopi hende ta bay for di dienst, no di polis so pero tambe for di otro departamentonan, pa sector priva pasobra e toelage ta mas atractivo y tin mas entrada. Entrada ta mas importante pa subrevivi, pasobra costo di bida ta halto”, el a enfatisa.
Bernardus a informa cu SPA ta haciendo investigacion y ta reuni informacion concreto pa acerca e personanan responsabel cu proposicionnan pa e cambionan necesario. Segun e, e situacion actual no por sigui sin haya atencion.
Otro punto cu Bernardus a trece dilanti ta e balor di e bonnan di cuminda pa personal cu mester traha un dobel turno pa motibo di falta di personal y cu no ta haya tempo pa cushina.
Segun e, durante hopi aña, e bon tabata di Awg. 12,50. Ex-minister Andin Bikker a aumenta e suma pa Awg. 18,85. Sinembargo, el a señala cu e suma ainda no ta suficiente pa cubri e costo di un cuminda.
Segun informacion cu SPA a reuni, e costo promedio di un cuminda na restaurantnan na Aruba ta supera Awg. 25,00, un suma mas halto cu e balor di e bon cu personal ta ricibi.
Bernardus a subraya cu mehoracion di e beneficionan ta necesario tanto pa atrae personal nobo como pa retene esunnan cu ta den servicio. El a splica cu cada salida ta aumenta e presion riba e personal cu ta keda, cu como consecuencia mas trabao y mas oranan di overtime.
“Tur esakinan ta cosnan cu mester modernisa. Gobierno su toelagenan ta hopi abou, y mester a haci algo, no di awe, sino di ayera caba, pasobra costo di bida ta sigui subi. Beneficionnan mester mehora y bira mas atractivo pa hende bin y keda pasobra si mas hende bay, ta mas trabao lo tin y mas overtime”, Bernardus a enfatisa.
