Jason Margarita a bisa cu el a enamora di e mucha pero no tabatin relacion sexual

Fiscal a exigi 3 aña di prison - ORANJESTAD – Ayera mainta Jason Margarita (39) di Curacao biba na Aruba a presenta den Corte di Husticia pa e caso penal cu Ministerio Publico a cuminsa contra dje.

Jason a bisa Hues cu el a enamora di e mucha pero no tabatin relacion sexual cun’e. Fiscal ta haya Jason culpable di a haci actonan inmoral cu e mucha y tabatin relacion sexual. Fiscal a exigi 42 luna di prison di cual 6 luna ta condicional. Den e articulo aki DIARIO ta concentra riba e caso y exigencia di Fiscal. Den un otro articulo ta publica e defensa di abogado di Jason.

ABUSO DI MUCHA

Fiscal ta acusa Jason cu entre September 2020 y Februari 2021, tabatin relacion sexual cu un mucha muher A. kende tabata bou di 16 aña. Tambe Fiscal ta acusa Jason cu den e mesun periodo el a mishi na partinan intimo di e mucha A.  

JASON TA DESMENTI

Hues a puntra Jason si e acusacionnan ta berdad. Jason a desmenti e acusacionnan. El a bisa Hues cu e mucha A. tabata traha practicamente henter dia cun’e. E mucha tabata traha den e gym y a bira un atleta di fitness y hasta instructor. E tabata percura pa e. Segun Jason, e mucha tabata seduci’e y na dado momento el a enamora cun’e.

Segun Jason, e sa cu A. ta menor di edad y cu e ta casa cu un yiu muher. El a bisa Hues cu el a palabra cu A. cu ora A. tin 18 aña, lo bay dicidi kico ta bay pasa. Jason a para riba cu e apesar cu el a enamora cu A., e no tabatin relacion sexual y tampoco a mishi cun’e.

MUCHA VICTIMA DI ABUSO

Jason a sigui bisa cu e mucha A. a wordo abusa pa su abuelo y su omo. El a desmenti categoricamente di tabatin relacion sexual cu e mucha. Segun Jason nan tabata den un relacion pero no sexual. Hues a mustra riba chat di WhatsApp caminda ta mira cu Jason lo tabatin relacion. Segun Jason, Polis a coy parti di chat di WhatsApp pa laga mustra cu tabatin relacion sexual pero no ta asina.

FAMIA A FORZA VICTIMA

Hues a puntra pakico Jason no a declara esaki promer. El a splica cu su promer abogado a bis’e pa keda keto. Despues el a busca mr. Arends Marchena y e ora ey el a dicidi di papia. Hues a puntra pakico e mucha A. a declara contra Jason. Segun Jason, e mama y ruman muher grandi di A., tabata pone presion pa e declara contra dje, pa asina tapa loke a pasa cun’e cu su mesun abuelo y su omo.

  Hues a remarca cu apesar di loke Jason ta bisa, A. ta keda mantene su declaracion di tabatin relacion amoroso y sexual cu Jason.

FISCAL

Fiscal a bisa Hues cu aki ta trata mucha di 15 aña, kende a bisa cu e tabatin relacion sexual voluntario cu Jason. Fiscal a bisa cu den caso di abuso mester tin prueba di sosten. Den e caso aki e ta haya cu tin suficiente prueba di sosten y combina cu declaracion di e victima, tin suficiente prueba. El a mustra cu dia 3 Februari 2021 e mama di A. a haci denuncia. El a bisa cu dia 2 Februari 2021 ora cu A. a bay drumi, el a bay coba den su cellular y a mira chats di WhatsApp entre A. y Jason. El a conclui cu Jason a sunchi su yiu A. Fiscal a mustra cu hendenan di gym di Jason a bisa cu tur ora A. y Jason tabata hunto y ta papia den orea di otro. E ruman muher grandi di A. despues di a mira e chats di WhatsApp ta haya cu Jason tabata manipula A.

   Fiscal a mustra cu segun e mucha A., el a acerca Jason pa tin relacion pero Jason a distancia pasobra e ta menor di edad y cu Jason ta casa. Na dado momento A. lo a duna Jason un sunchi den boca y asina a crea un relacion di sunchimento. Segun e mucha, despues tabatin mishimento y despues relacion sexual. E mucha A., a bisa cu e tabatin diferente biaha relacion sexual voluntario cu Jason y cu e no tabata kier pa castiga Jason pa esaki. Fiscal a mustra cu awor ta promer biaha den Corte cu Jason ta bisa cu e ta enamora di A.

   Fiscal a mustra cu a base di chatnan di WhatsApp, KZP a interoga A. kende a bisa cu nan tabatin relacion sexual den e camber di masashi den gym. Segun Fiscal, Jason ta bisa cu nan tabatin un relacion amoroso pero no tabatin relacion sexual y tampoco sunchimento.

Na opinion di Fiscal, Jason ta desmenti di tabata den camber di masashi cu A. Awor den Corte e ta bisa cu por bien ta cu e tabata algun biaha cu A. den e camber di masashi pero nada di relacion. Tin testigo a mira cu A. tabata bay den e camber di masashi y despues Jason ta drenta. Despues di 3 pa 4 minuut Jason ta sali y despues A. Fiscal a remarca cu promer Jayosn ta desmenti y despues ta bisa cu e tabatin relacion amoroso pero cu KZP ta fabrica cosnan pa mustra cu e ta culpable. Fiscal tabata menciona chatnan cu a download pero no ta asina cu a fabrica e contenido.

  Fiscal ta haya Jason culpable di a haci actonan inmoral cu un mucha y tambe a tene relacion sexual cun’e. El a tuma Jason na malo pa esaki. Fiscal a exigi 42 luna di prison, di cual 6 luna ta condicional cu un tempo di prueba di 2 aña. Tambe Fiscal a exigi pa Jason cay bou guia di Reclassering.