Ayera tardi el a wordo laga liber di KIA - ORANJESTAD – Ayera mainta Hues di Corte di Husticia a dicta sentencia den e caso penal cu Ministerio Publico a cuminsa contra Rudy Carti.
Por a constata cu di e acusacionnan, Hues a declara Rudy liber di 3 acusacion. Esey a trece cun’e cu e exigencia di Fiscal a wordo reduci drasticamente.
EXIGENCIA FISCAL
Fiscal den su exigencia a mustra cu Carti a tacha integridad di e 8 damanan cu a pone confianza den dje. 3 violacion y 5 mishimento. No por tolera esaki. Fiscal a exigi 5 aña di prison y prohibicion di traha pa 8 aña.
DECLARA LIBER DI 3 CASO
Via video conference Hues a lesa e sentencia pa Rudy Carti. Hues a cuminsa cu e no ta haya Rudy culpable den e caso di 4 dama. Hues a bisa cu den e casonan aki no tin prueba di sosten.
Hues a bisa cu e ta haya legalmente proba e casonan di 4 dama. Tin caso caminda Rudy lo a hinca dede den e parti intimo y tin caso caminda el a mishi cu e parti intimo. Hues ta haya declaracion di e damanan aki confiabel. Hues a usa e casonan aki hunto como prueba di sosten pasobra ta trata di e mesun forma di masashi. Hues ta haya cu e masashi no tabatin mester mishi cu parti intimo. E mishimento ta wordo considera como actonan inmoral mientras cu e penetracion di dede ta wordo considera violacion. Hues ta haya cu Rudy a viola confianza cu e hendenan aki tabatin den dje como masahista.
Pa cu e castigo, Hues a tene cuenta cu e ta un first offender. Hues a condena Rudy na 2 aña di prison di cual 1 aña ta condicional cu un tempo di prueba di 2 aña. Hues a ordena pa Rudy keda sin trata como fisioterapista pa 4 aña. Tambe a ordena pa Rudy paga 7 mil florin di daño na un dama y 2 mil na un otro. Hues a pone tambe e medida di pago pa si Rudy keda sin paga, e lo mester bay sera.
Den combersacion cu su abogado mr. Carlo, por a compronde cu ayera atardi Rudy Carti a wordo laga liber di KIA.
{gallery}Rudy Carti condena fisioterapista{/gallery}
