ORANJESTAD (AAN): E siman aki diaranson, ta bay tin e prome barco crusero cu ta yega Aruba den e temporada post covid.
Prome Minister Evelyn Wever-Croes a duna di conoce cu a papia hopi riba e yegada bek di e barconan crusero. A papia hopi riba e protocolnan cu mester tin na lugar.
Ta bay ricibi 'Celebrity Millenium' y e ta bay yega cu 546 pasahero abordo y cu un crew di 770 persona.
Tur persona riba e barco tur ta vacuna of mester a haci test pa por a subi e barco y esaki ta e caso di muchanan bao di 18 aña cu no por a haya e vacuna ainda, e mandatario a indica.
E barco crusero aki ta bay sigui bin Aruba cada dos siman riba diaranson. E lo yega 8'or di mainta y lo bay 6'or di atardi.
E barco a sali for di Sint Maarten caba diasabra. E ta pasa Barbados, Corsow pa despues yega Aruba pa bay bek Sint Maarten.
Wever-Croes a expresa cu esaki ta un desaroyo importante pasobra e lo trece desaroyo na Aruba pa tur esnan cu ta custumbra di traha cu turistanan crusero. Nan ta bay haya un oportunidad atrobe pa por sigui cu e trabao cu nan tabata haciendo.
Ta papiando akinan di entre otro tour operators, tiendanan, restaurantnan, etc.
