ORANJESTAD (AAN) – Parlamentario Setty Christians-Yarzagaray, a hiba palabra den conferencia di prensa y a elabora riba e tema di subsidio di salario.
Yarzagaray a tuma nota di algun informacion duna den e transcurso di e siman anterior, y el a para keto un rato na e necesidad di ayudo cu gobierno a bin ta brinda na subsidio di salario, desde inicio di e pandemia.
E parlamentario a corda cu dia 26 di Maart 2020, Conseho di Minister di Reino a tuma un decision di, no solamente, duna Aruba asistencia financiero pa subsidio di salario, pero a condiciona esaki; a pone un factor di control na e financiamento aki.
Aruba a haya e sosten pa di tres cuartal aki di 2021. Dia 1 di Juni aki, gobierno mester a entrega un rapport na CAft, splicando con e placa aki a wordo distribui.
Yarzagaray a trece dilanti cu pa haya e subsidio di salario, en principio tabata perdida di 25% di e entrada di e companianan, pero tambe a base di e situacion di e pandemia e ta basa riba proyeccion y esey kiermen cu subsidio mester wordo duna na e companianan pero sin cu tabata tin e cifra real ainda. Aworaki, e parti di control cu Hulanda ta exigi ta pa Departamento di Impuesto haci un calculacion real, basa riba informacion financiero entrega door di e companianan tocante kico realmente nan a bay atras cune.
Yarzagaray a splica cu aworaki si e no ta cuadra, gobierno mester tuma pa pasonan di Hulanda, e rectificacion di esaki.
El a subraya cu tabata sumamente necesario pa gobierno duna subsidio di salario na banda di FASE, y asistencia na empresanan chikito y mediano. E meta principal tabata pa evita perdida di empleo.
E parlamentario a remarca cu na momento cu Pais Aruba y mundo henter ta a haya su mes den un pandemia y un crisis, tabata hopi necesario pa tuma un decision di con pa mantene, no obstante esey, e stabilidad di e pais pa e no cay.
Yarzagaray a expresa cu hopi pais a “crash” pero di Aruba no por bisa esaki, door di e decision tuma di asistencia. Pero e asistencia aki no a bin sin mas. El a bisa cu Aruba su situacion financiero, prome cu esaki, tampoco tabata di gaba. Al contrario, Aruba tabata yen di debe y den e rapport Bo Aruba ta señala cu 1.6 biyon florin cu no tabata tey mas.
E parlamentario a indica cu no ta awo pero for di 2018 Gobierno a cuminza paga. El a sigui bisa cu dia 18 di Juni, den Conseho di Reino lo bay tuma e decision si Aruba lo bay sigui haya e asistencia financiero, pa e parti di subsidio di salario of no.
Y esaki ta un exigencia cu Hulanda a pone cu lo bay haci un estudio riba con e placa aki a wordo distribui, con realmente e placa cu Aruba a fia cu 0% di interes a wordo uza, si esey tabata manera cu mester ta.
Pesey, ta sumamente importante pa wak e necesidad y seriedad con Gobierno ta atende cu e placa aki si no demostra cu e placa a wordo uza pa locual a wordo fia, e chens ta grandi cu e tranche pa Aruba tambe ta cera y esaki ta importante no solamente pa e gobierno actual pero pa esun cu ta bin despues.
