Ya caba hardin di Scol Basico Washington produciendo berdura

ORANJESTAD (AAN): E hardin cu docentenan hunto cu alumnonan, y cu yudansa di e.o. Living Soil Aruba,

y Ministerio di Sector Primario a crea na Scol Basico Washington dia 20 di Januari 2024, a haya un bida briyante y ya caba ta produciendo!

  E prome stock di Concomber Chikito a wordo piki caba, y nan a ser bendi caba.  Tur esaki sigur a wordo usa den un plato stoba cu a wordo prepara pa Dia di Himno y Bandera.

  Den e hardin por mira patia ta crece, tambe jambo, kalalu cora, y tambe tomati.  Tambe boonchi berde y preto, como tambe zucchini ta cuminsa produci na forma abundante.

   Mientras cu tur hende ta keda warda cu pasenshi pa nan crece, y tambe pa e palonan di mata crece, tur hende ya ta contento pa mira con nan esfuerzo a bin ta produci resultado asina delicioso.

   Nan ta gradici tur hende cu a contribui na e proyecto increibel aki.  DIARIO a compronde cu Diasabra awor, esta 23 di Maart 2024, ta turno di Colegio Hilario Angela na Weg Fontein pa planta nan hardin.  Esaki lo cuminsa for di 7:00 am, y tur boluntario ta bon bini pa bay duna un man.

   E potretnan aki ta pa cortesia di Living Soil Aruba.