ORANJESTAD(AAN): Despues cu Diaranzon Secretario di Estado Alexandra van Huffelen a reuni cu Prome Minister Evelyn Wever Croes y diferente departamento di Gobierno di Aruba,
el a tene un conferencia di prensa pa informa prensa di esaki, mientras cu prensa a haya un oportunidad tambe pa haci pregunta.
Van Huffelen a cuminza na bisa cu e ta contento di ta bek riba nos isla y contento di a wordo ricibi un biaha mas na un manera agradable.
“E motibo mas importante pa bin Aruba ta pasobra alrededor di 1 aña a pasa desde cu nos a firma e ‘Onderlinge Regeling’”.
Ta trata pues di un acuerdo di cooperacion entre 4 pais incluyendo Aruba, den cual nos a palabra cu otro cu hunto nos ta bay traha riba introduccion di reformanan cu ta bon pa fortalece e paisnan, segun e Secretario di Estado.
El a sigui bisa cu e ta haya cu tabata un bon momento pa bay wak no solamente kico hunto a wordo logra den e tempo cu a pasa, pero tambe kico mas falta pa wordo haci den e añanan nos dilanti, mirando cu e Onderlinge Regeling ta core ainda dos aña mas.
“Aki na Aruba naturalmente mi a papia cu Prome Minister, cu minister di Finanzas y cu minister di Enseñanza”.
Mi a toca un cantidad di tema cu nan di cual e parti principal ta cu hunto nos ta hopi cla den subraya e importancia di e reformanan y realiza esakinan.
Nos tin cu specialmente percura pa haci esaki na un manera structura y sostenible.
No ta asina cu nos ta bay haci algun proyecto pa mehora algo, sino nos tin cu wak hunto cu nos por haci esaki na un manera cu lo trece resultadonan pa futuro, segun van Huffelen.
E Secretario di Estado a sigui bisa cu el a haci palabracionnan cu Gobierno di Aruba riba esaki, unda cu e intencion ta sigur pa sigui haci esaki hunto.
El a indica cu el a palabra cu minister di Finanzas Xiomara Maduro pa sigui traha hunto pa fortifica y simplifica e sistema di belasting mas, pa wak con por aumenta e entrada.
“Mi a wak cu te awor di berdad e Onderlinge Regeling a realiza hopi cos”.
Di berdad nos a logra reformanan cu ta hopi importante y nos a haci esaki bon hunto.
Mi a wak hopi hende dedica na esaki, no solamente e politiconan sino tambe e hendenan cu tin cu haci e trabao diariamente.
Nan a haci esaki cu hopi entusiasmo y esaki ta algo hopi bon, segun van Huffelen.
El a sigui bisa cu bastante a wordo logra via e asina yama BBO aan de Grens, mientras cu kitamento di diferente vrijstelling a pone cu a recupera retrazonan.
Segun van Huffelen e intencion ta pa sigui haci palabracionnan cla pa e temponan cu ta bin.
