Un suma di 72.9 miyon florin cu a wordo duna dimas na subsidio di salario

*Tin compania cu a bisa di a perde 100% di entrada siendo cu tabata 40%

ORANJESTAD(AAN): Durante un conferencia di prensa Dialuna atardi  minister di Finanzas Xiomara Maduro a toca e tema di subsidio di salario y a splica cu despues di investigacion y calculacion a yega na e conclusion cu un suma di 72.9 miyon florin cu a wordo duna dimas na subsidio di salario.

“Si bo wak bon, e promedio di venta cu companianan a perde den 2020 a yega casi 50%”,

Pues 48.4% ta e promedio di locual e companianan a cay atras den venta debi na e pandemia, segun e mandatario.

Haciendo uso di graficonan, e minister a duna un bista di e sumanan cu mester wordo cobra y locual e companianan a indica di a bay atras.

Tin companianan cu por ehempel a indica cu nan a bay atras 100%, siendo cu den realidad nan a bay atras cu 41.2%.

Maduro a presenta un grafico tambe riba cual por wak cua tipo di compania ta esun cu mas mester paga bek, basa riba placa haya dimas.

A resulta cu e sumanan mas grandi mester wordo cobra ta for di e categoria di ‘actividadnan di acomodacion y servicio di cuminda’, cu ta 16.3 miyon florin.

Despues ta sigui e companianan di ‘wholesale’, ‘retail trade’, reparacion di vehiculonan di motor y motocicleta, for di cual mester cobra bek14.7 miyon florin.

“Pues den e dos categorianan ey mayoria di e placa cu mester wordo cobra bek ta concentra”.

Ta importante pa bisa cu e cobranza aki lo wordo haci conforme e capacidad di pago di e compania, segun Maduro, kende a indica cu lo tene consideracion cu e companianan, cu lo haya chens pa paga e placa bek via un areglo di pago.

El a splica cu CAft a pidi Gobierno pa reporta con ta pagando e suma di 72.9 miyon florin bek.

“CAft a pidi Gobierno tambe pa integra esaki den administracion di pais Aruba”.

Cu otro palabra nan a pidi Gobierno pa asina e ora ey laga e placa aki pa una vez cu e placa wordo cobra, pa e drenta caha di Gobierno, segun e mandatario.

El a indica cu e meta di esaki ta entre otro pa baha e deficit di pais Aruba.