Nan lo reparti e suma di 1.8 miyon Florin - ORANJETSAD (AAN): Manera ta conoci, e premio gordo di Mini Mega Plus di Diabierna anochi a bay! E numbernan ganador tabata 07, 14, 27, y 29. Megaball ta 13.
A resulta cu tin un solo ticket ganador cu a paga 2 Florin extra pa asina hunga e Megaplus. Pues e persona cu e ticket a gana e total di 1.800.000 Florin cumpra na Cadena Alexander Lottery riba Caya Betico Croes.
Pero Dialuna a sali na cla, cu ta un grupo di colega a pone placa hunto pa cumpra un serie di number, y un di nan numbernan a sali ganador!
E grupo di 7 trahador aki cu a pone placa hunto, a presenta Dialuna cu sonrisa grandi riba nan cara na oficina di Lotto na Playa. Nan a yega pa cobra nan premio di Mini Mega Plus.
E 7 ganadornan aki ta un grupo di colega cu a pone placa hunto y nan a combina nan fecha di nacemento pa asina sera e numbernan ganado. Ta algo cu nan ta haciendo pa añas caba y Dialuna nan a bin hunto pa cobra e premio di 1 miyon y 800 mil Florin!
Como cu e premio semper tin di wordo poni na nomber di un persona, a escoge pa Richard su nomber bin riba e cheque simbolico, pero e ta sosteni pa 6 demas coleganan.
E premio pues lo wordo dividi den 7 persona, y esey nifica cu cada uno lo ricibi e suma di 257.142 Florin. Sigur e premio di 257 mil ta hopi atractivo pa fin di luna aki.
Lotto, e loteria di Aruba tin diferente wega; Catochi, Big 4, 1-OFF, Lucky 3 y Multi-X, Zodiac, Wega di Number Curaçao di Lotto, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana. Cumprando Lotto bo ta contribui na deporte riba nos isla. E meta ta pa organiza loteria, cambia bida di su hungadonan y na mes momento inverti den deporte local pa medio di donacionnan na e comision di subsidio
