Tur loke docentenan a siña den e “SKOA Onderwijs Congress 2025” nan lo aplica mesora den nan klas

Jessica Maduro- Irausquin, HR Manager:

ORANJESTAD (AAN) – Jessica Maduro-Irausquin, Manager di Recurso Humano na SKOA, den entrevista cu Matutino DIARIO a indica cu siman pasa SKOA a cuminza cu su “Educational Week” y e fin di siman aki a conclui cu nan SKOA Congress 2025, cu ta pa tur nan docentenan, pa yuda nan den nan profesionalizacion, unda tur locual e docentenan a siña durante e congreso aki, nan lo aplica mesora den klas.

“E ta hopi importante pa nan keda up to date cu innovacionnan cu ta tumando lugar cada aña, y pa bo keda desaroya mas, cada biaha.

Door cu nos ta haciendo en combinacion cu Erasmus Plus, nan ta bay y ta siña algo nobo, esaki tambe ta forma parti di e profesionalizacion cu hendenan di afo, cu ta bin duna curso pa nan sigui desaroya y haci e lesnan pa e muchanan mas atractivo y cu actualiza cu e mundo di awendia”, señora Maduro a comenta.

Esaki ta un planificacion di e manera con e maestro ta duna les, y esey ta e parti unda nan ta enfoca mas riba dje, con e maestro por yega na e alumnonan mas lihe.

“E metodo ta keda igual, ta e manera con bo ta trece e ‘aan pak’ pa e muchanan pa nan por compronde e materia”, Jessica Maduro a señala.

El a señala cu e tools ta pa e docentenan aplica nan den klas. “Ta tools cu expertonan ta trece p’asina nan bay aplik’e den nan Klas. Esaki ta e di ocho edicion awe, hunto cu un partner cu pa ocho aña ta haciendo esaki, y fuera di esey nos ta gradici full nos team di SKOA cu hunto a hinca e organizacion aki den otro, y otro partnernan cu tambe tabata envolvi”, señora Maduro a señala.