Muzaninn Wever, Vice-President di Parlamento:
ORANJESTAD (AAN) Vice-president di Parlamento, señora Muzaninn Wever, den entrevista cu Matutino DIARIO, a expresa cu Parlamento ta tuma hopi na serio e cartanan cu nan ta ricibi di cualkier persona di pueblo, pero esaki mester ta acompaña cu prueba, pasobra nan prome responsabilidad ta pa bay investiga kico e carta ta precies.
Den e caso di señor Jayburtt Dijkhoff, su carta ta yen di alegacion y acusacion, pero e no ta acompaña pa ningun carta di prueba, y asina no por haci mucho cos cu ne.
Ora señor Dijkhoff tin prueba cu tur libertad e por bay directamente na Ministerio Publico pa bisa cu tin corupcion y laga OM haci su trabao pa asunto di corupcion.
Si e ta bisa cu e minister a haci corupcion e ora ey e tin cu presenta e pruebanan y asina e minister tambe tin su caminda di cana.
“Pasobra djis tira acusacionnan sin mas no ta duna e base pa bay tras di un caso. Door cu no tabata tin prueba, pero solamente acusacionnan nos a gewoon tum’e y ora cu nos tin tempo, nos lo bay adresa esaki”, Vice-President di Parlamento a reitera.
El a bisa si, cu Parlamento por haci investigacion, pero obviamente nan mester maneha un base mas amplio. Parlamento tin diferente forma di atende cu asuntonan asina aki, Wever a señala.
El a splica cu: uno ta, puntra e minister, dos ta haci interpelacion, y tres ta trata e aangifte cu señor Dijkhoff a presenta. Pero un aangifte ta un remedium asina pisa cu mester traha full un dossier, bay onderzoek, busca testigonan, y mester pone placa disponibel pa un tipo di investigacion asina, segun Muzaninn Wever a señala.
“Pues, te aworaki un carta di un persona no ta bay move e wielnan den un direccion asina fuerte. Nos ta bay haci nos trabao di investiga pero nos tin mil y un asunto cu actualmente nos ta ocupa cu ne, y un carta sin prueba, eigenlijk no ta haya un prioridad cu otro cosnan cu nos sa cu si tin prioridad”, Vice-Presidente di Parlamento a remarca.
