Tres team di 11U y tambe 14U a viaha pa Orlando pa campeonato di Perfect Game

ORANJESTAD (AAN): Siman pasa debi cu Horcan Nicole a pone diferente evento cancela den centro di Florida,

esey a hala fecha tambe di un competencia di Baseball hubenil planea na Sanford, cu ta keda net panort di Orlando na Florida.

   Cu empuhe di The Stars Organization na Aruba, nan a logra di participa cu 3 team di e isla aki pa bay atende e campeonato di 2022 Perfect Game East Fall Championship.  Tur e weganan aki lo bay ta na BOOMBAH Sports Complex na Sanford, Florida.

   Pa categoria di 11U lo tin dos team di Aruba, esta ‘Bigshow Stars AAA’ cu nan coach Elwin Rincones, tambe ‘Bigshow Warriors AA’ cu nan coach Edmar Rincones.

   Pa categoria di 14U lo tin un solo team di Aruba, esta ‘Bigshow AAA’ cu nan coach Edgar Rasmijn.

   Perfect Game ta un di e eventonan di mas grandi pa scouting di scolnan na e parti aki di Merca.  Segun Elwin Rincones, kende ta presidente di Stars Organization, desde 2017 caba Aruba ta participando na Perfect Game.  Y awor na 2022 por mira cu hopi di e hobennan pelotero di Aruba cu a yega di participa na Perfect Game, awor ta hungando pa baseball na Merca, of ta firma cu team di MLB na Republica Dominicana.

   E ta un structura cu The Star Organization tin traha pa empuha e hobennan aki pa nan purba na logra yega un nivel mas halto den Baseball.  Pues cu e muchanan chikito aki nan ta prepara nan di awor caba, pa ora nan bira edad mas grandi, nan por logra algo den esaki.

  E ta habri caminda pa e muchanan haya beca den futuro, y esey ta e estimulo pa e organizacion aki sigui busca forma pa cada aَña nan viaha pa Florida pa participa den e Perfect Game Championship aki.

   Teamnan di Aruba tin di bay den exterior pa asina calibra nan mes y mira con bon nan ta para.  Y esaki ta un forma cu por yudabo haci comparacion di e peloteronan y di nan habilidad.

   E hobennan ta haya chens di hunga weganan den exterior, pa asina nan mes mira y observa tur cos, pa asina ora di bin bek Aruba, nan por sigui traha pa bay na e siguiente nivel personal.

   Pa a haci e viahe, The Stars Organization a organiza diferente rifa, y evento pa recauda fondo pa haci nan participacion posible.  Elwin Rincones ta gradici tur esnan den e comision, y tur cu a duna un man pa keda pusha pa e viahe a bira posible, incluyendo varios patrocinador.  Hasta a gradici Southwest Airlines cu a logra di cambia nan ticket debi cu nan no por a viaha durante Horcan Nicole di siman pasa.

   E ta algo pa inverti den futuro di mesun pais, y sigui entrena nan pa mehora den baseball.