Hopi comerciante local interesa den expande nan mercadonan

Exprodesk a conta cu hopi bon acogida

ORANJESTAD (AAN):   Diabierna ultimo a tuma lugar e evento ExproDesk den nan edicion di e di 5 aniversario. Esaki a wordo organisa door di Departamento di Asuntonan Economico.

            Sharon Meijer, Foreign Economic Relations Advisor a duna di conoce cu nan a conta cu un acogida tremendo. Tabata tin diferente booth cu expositornan cu productonan varia di calidad halto.    

            El a expresa di ta hopi contento di wak cu na Aruba tin asina tantisimo producto di un calidad cu por competi internacionalmente.

            Awor e plan pa 2023 ta pa encurasha mas negoshi pa tuma e stap aki di amplia nan horizonte y exporta tambe nan producto.

            Aworaki loke a sinti falta cerca e comerciantenan local ta falta di conocimento riba algun proceso manera entre otro e parti di logistica pa nan cuminsa exporta. Exprodesk su mision ta pa guia y duna tur informacion riba kico tin mester pa esunnan cu ta interesa den futuro pa expande y bira mas grandi, Sharon Meijer a indica.

             Tin 6 area cu ta esunnan cu mas e comerciantenan local ta mas interesa. Tin primeramente Caribe, Europa, Merca, Asia, Republica Dominicana y e sector local, a agrega.