Training di tsunami a tuma lugar diahuebs na Aruba

'Caribe Wave 2022 Tsunami'

ORANJESTAD (AAN):   Diahuebs mainta, hopi departamento como tambe scolnan, comercio, hotelnan y otro instancianan a participa den un training di tsunami. Esaki den cuadro di e asina yama 'Caribe Wave 2022 Tsunami'.

Pa cu esaki, e punto di accion tabata relaciona cu un simulacro di temblor grandi di magnitud 8.2 lo a sosode 10 am den e region.

E prome alerta manda door di Bureau Rampen Bestrijding Aruba a indica cu un temblor grandi a genera un tsunami cu por ta destructivo pa e costanan di Aruba.

Asina mes a alerta comunidad, cu e prome ola di e tsunami lo a yega Aruba pa 10:55 am y e accion recomenda tabata pa tur persona banda di e costanan evacua pa areanan mas halto segun e areanan asigna.

Cu e alerta aki como simulacro, tabata tin participacion di entre otro scol, hotel, departamentonan di gobierno cu a inicia nan actividadnan di training asina cu e alerta a wordo emiti.

Mester enfatisa cu esaki ta parti di un training cu ta tuma lugar pa asina Aruba por ta prepara den caso di un calamidad manera un tsunami.

Ta importante pa sa tambe cu tin un aplicacion (APP) Alert FM cual ta esun unda comunidad lo por ta na altura mesora den caso cu algo sosode na Aruba. Corda download e APP aki riba bo celular.

Riba potret, trahadornan di hotel Marriot Courtyard cu tambe a participa di e training. Tambe por a mira imagennan di personal di Departamento di Salud (DVG).