DNM ta confirma presencia di cantidad halto di yerba di lama na costa

Manera DIARIO a trece dilanti caba 

ORANJESTAD (AAN)- Den transcurso di siman Directie Natuur en Milieu (DNM) a haya informacion cu tin yegada di yerbanan di lama na nos costanan rond di Aruba.

            Diahuebs,  DNM a constata cu na Santana di Cacho (San Nicolas) tin yerbanan di lama cu a yega  na e sitio. E yerba di lama cu a constata ta di e especie di Sargassum.

            DNM a publica riba e pagina social un anuncio pa alerta e comunidad di e efectonan cu nan por experiencia ora di bishita lama. Entre diferente organisacion gubernamental tin un colaboracion pa adresa e posibel problema cu e fluho di yerba di lama por trece cu ne.

            Pa locual ta trata e tema di fluho di Saragassum na nivel internacional, UNEP- CEP (United Nations Environment Program- Caribbean Environment Programme) di cual DNM tambe ta miembro, nan a saca un relato pa yuda organisacionnan cu formulacion di e maneho cu ta referi na fluho di Sargassum (yerba di lama). Un di e referencianan ta un yamada pa yena un sondeo (survey) ora cu tin presencia di Sargassum na islanan den Caribe.

            E presencia y holo desagradabel di e yerba di lama na nos costanan por afecta esunnan cu bishita lama. DNM a comunica cu AHATA riba e situacion cu a presenta, asina nan por informa nan miembronan. Tambe departamentonan manera DOW ta na altura di esaki pa asina instala un maneho pa hacimento limpi di e beachnan mas frecuenta pa recreacion.

            Pa e piscadornan cu ta pisca na baranca, como esnan cu ta pisca for di boto tambe mester ta alerta cu e presencia di yerba di lama y con esaki por afecta nan piscamento. E liñanan di pisca ta bira mucho mas pisa pa ranca y esaki por kibra.

            Pa e motornan di boto tambe esaki por obstaculisa su funcion. Ta di remarca cu esaki ta un fenomeno relativamente nobo (2011) y cu no tin un maneho estableci ainda pa tuma decisionnan. Pa duna informacion obhetivo di e  situacion temporal  mester haci mas investigacion cientifico pa conclui kico ta e causa y e efectonan di presencia di yerba di lama.

            Locual si ta posibel ta pa notifica DNM via nan website dnmaruba.org , si nota e yegada di cantidad halto di yerba di lama na otro beachnan. Tambe ta encurasha comunidad pa haci uzo di investigacion di ciencia comunitario door di yena un sondeo (survey) cu tin riba e plataforma The HUB - SARGASSUM INFORMATION HUB (sargassumhub.org) of click directamente riba e link https://bit.ly/3JdHoap

            DNM ta pidi comunidad comprension pa e situacion cu a presenta na e costanan cu presencia halto di yerbanan di lama, Sargassum.

            Adhunto DNM ta comparti algun imagen di e yerba di lama presente na Santana di Cacho, San Nicolas.