Mester investiga podernan politico scondi cu kier stroba Eagle --- Prueba con DIARIO a adverti pa relacion WEB/Gasunie/AVP --- DIARIO a exigi pa bisa kende ta e candidatonan pa entrega gas
ORANJESTAD (AAN)- Ta cu hopi atencion DIARIO tabata sigui e desaroyonan pa yega na un acuerdo cu Eagle LNG.
DIARIO tabata e medio di comunicacion cu a saca documentonan importante pone riba mesa for di e momento cu a bira obvio cu WEB tabata stroba un acuerdo entre Gobierno Wever-Croes 1 y Eagle LNG.
E proyecto cu a wordo presenta dor di Gobierno Wever-Croes a haya hopi atencion den medionan di comunicacion rond mundo pero a wordo opone for di prome momento dor di cierto gruponan cu tabata directamente mara na Gobierno di Mike Eman.
DIARIO a realisa hopi investigacion y a bolbe den tempo pa presenta documentonan con partido AVP pa medio di Refineria di Aruba tabata habri porta pa entrada di Gasunie di Hulanda.
DIARIO a produci documentonan cu tabata mustra con Gasunie di Hulanda tabata hasta interesa den union cu Nicolas Maduro pa medio di e proyecto Citgo, den cual gas tambe a wordo introduci.
Ta cu hopi problema Prome Ministro Wever-Croes a logra pa deshaci di e obstaculonan di gerencia bieu di WEB, cu abiertamente tabata bay contra decisionnan di Prome Ministro Wever-Croes.
Ta den e tempo aki DIARIO a realisa investigacion profundo pero tambe a exigi pa bini un investigacion pisa di tur loke ta relaciona cu e acuerdo cu WEB, Gasunie di Hulanda y Refineria di Aruba bou Hoevertsz cu tabata representa Gobierno di AVP, a firma y di cual awe DIARIO ta presenta prueba.
Awe mas cu nunca DIARIO ta bolbe exigi un investigacion cu mester trece na claridad, cual tabata e companianan cu e trio tabata tin pensa pa presenta como candidatonan pa atende cu gas pa WEB.
Awe DIARIO ta reproduci e prueba cu DIARIO a presenta na Aruba di e acuerdo cu tabata tin for di 17 di November 2017 entre AVP, Gasunie y WEB pa gas pa WEB pa medio di Gasunie di Hulanda.
Awe atrobe ta keda demostra cu DIARIO ta atende cu berdad y ta busca bienestar di Pueblo.
DIARIO awe mas cu nunca ta exigi pa bini investigacion serio den henter e asunto di gas pa WEB, cu ta causante di uno di e conflictonan politico mas serio cu historia di Aruba a yega di conoce for di tempo colonial.
Aruba mester di claridad riba e decision di RAIZ pa hala atras na momento cu e pais a mara su mes na un compromiso cu un partner di renombra internacional.
Informantenan pisa na Aruba a splica DIARIO pa basta dia, cu mester tene cuenta cu podernan politico scondi na Aruba, caminda e negoshi di gas di Eagle lo sirbi proposito di Pueblo pero lo stroba propositonan scondi.
DIARIO lo sigui lucha pa bienestar di Pueblo triunfa!
