Ton Kolman: “Nos ta contento pa firma CAO nobo pasobra nos sa cu empleadonan tin mester di mas salario”

FTA y Manchebo a firma CAO nobo

ORANJESTAD (AAN):  Diamars mainta Manchebo Beach Resort & Spa a firma un CAO nobo cu FTA y durante un conferencia di prensa managing director di e hotel Ton Kolman a bisa cu e ta contento cu a logra firma e CAO despues di 5 aña, despues cu 2 aña pasa e ultimo CAO a vence y a wordo extendi.

E pandemia a pone cu ta te awor a firma un acuerdo nobo.

“Nos ta contento cu nos a yega na un acuerdo, pasobra nos ta conciente cu costo di bida a aumenta y cu empleadonan tin mester di mas salario”, segun Kolman kende a gradici tur esnan cu a yuda pa e CAO nobo  wordo logra.

El a papia tambe riba e bon relacion cu pa mas cu 30 aña e tin cu FTA, indicando tambe cu pronto e lo bay cu pensioen.

Segun Kolman, e propietarionan nobo di e resort ta sigui mas o menos cu tur cos manera cu e tabata antes.

“E propietarionan nobo ta aprecia e empleadonan hopi y nos a duna nan un bonus extra luna pasa cu no ta den e CAO y e cooperacion cu management ta hopi bon”, segun Kolman.