ORANJESTAD (AAN): Departamento di Cultura a anuncia diamars durante un rueda di prensa un di nan proximo proyectonan.
Pa cu esaki, Robert Maduro, 'NGO Coordinator' di DCA a hiba palabra pa bisa c'un biaha mas nan ta organisa un tremendo proyecto cu ta 'Gang di Arte'.
E biaha aki e evento lo tin e lema: "Dream, Dare & Do'. 'Gang di Arte' ta un di e proyectonan cu pa varios aña ta hopi popular caminda tin un participacion hopi grandi di hopi hoben cu diferente talento ta mustra nan den e proyecto aki, Maduro a señala.
A agrega cu Departamento di Cultura ta sumamente contento di por traha cu diferente partner y organisacion no gubernamental y departamento di Gobierno pa asina aki por presenta varios proyecto riba diferente nivel y edad.
Banda di esaki, Junior Tromp, a laga sa cu e aña aki el a bin for di Hulanda pa e proyecto di 'Gang di Arte Dream, Dare, Do' cu ya caba a cuminsa.
Tromp ta un instructor y e ta dunando 'stunt' y tambe 'hip-hop'. Un delegacion a bin for di Hulanda, Spaña y Inglatera den cuadro di esaki pa comparti nan talento hunto cu e hubentud di Aruba, a bisa.
Gang di Arte ta un competencia dirigi na hobennan entre 14 y 21 aña di edad cu tin talento, ta creativo y activo riba tereno di arte visual, video, potret, arte di palabra, baile, deporte creativo, DJ, literatura, moda, multimedia, musica y teatro.
E evento final di Gang di Arte lo tuma lugar diadomingo 17 di Juli na Cas di Cultura. Corda cu e evento ta gratis pa publico.
