ORANJESTAD(AAN)— E invesigacion di DIARIO riba desaroyonan rond e Cas di Madushi di Marisol Lopez-Tromp na Noord ta continua
y ta haya sosten di cantidad di ciudadano Arubano, cu pa hopi tempo ta trata di haya un tereno di gobierno y awor a wordo confronta cu e hecho cu un ruman di Ministro Marisol Lopez-Tromp den algun dia a regla e tereno na Cas di Madushi na Noord.
Mientras DIARIO ta investiga e caso a base di documentonan cu e ta ricibi, ayera Michael Lopez a acerca DIARIO cu e informacion cu su persona no ta envolvi den e caso.
Un declaracion cu DIARIO ta acepta despues cu nomber di Michael Lopez a aparece riba documentonan cu DIARIO a presenta.
E investigacion di e forma cu e tereno pa e ruman di Marisol, Lelicia, cu tambe ta den directiva di e partido MAS cu awor Marisol ta dirigi, a wordo atende dor di Marisol Lopez-Tromp sigur ta keda bou investigacion.
Aki ta trata di un caso caminda fuera di normanan, cu ta exigi pa un Ministro no atende cu un caso cu ta beneficia su ruman, Marisol Lopez-Tromp a intermedia den tereno pa su ruman Lelicia cu a wordo yuda den algun dia.
Importante den e asunto aki tabata, cu Aruba na e momento cu den un tempo record e asunto di tereno pa Lelicia a wordo atende, Aruba tabata den un situacion special debi na e pandemia pero tambe problemanan a cuminsa manifesta nan mes den seno di e partido POR, cu a anuncia na cierto momento cu el a pidi Marisol Lopez-Tromp, cu e partido mes a nombra como Ministro, pa retira.
Marisol, cu tabata den e partido hunto cu Otmar Oduber sin ningun problema aparente y hasta a bira Ministro pa POR, wordo pidi door di e partido POR pa baha como Ministro.
Ora tuma nota di documentonan por mira cu segun DIP, na inicio di December 2019 a yega na un areglo pa erfpacht cu Lelicia ruman di Marisol y miembro di directiva di partido MAS.
Tabata temponan turbulento den partido POR y Otmar Oduber na mitar di December a baha como Ministro pa despues wordo reemplasa dor di Marisol.
Na Januari Marisol a huramenta como sucesor di Otmar Oduber pero cuatro luna despues a wordo pidi dor di su partido pa retira.
Na Juni 2020 mientras Aruba tabata den pleno pandemia y Marisol tabata den problema cu partido POR, e asunto di tereno a wordo atende dor di DIP den algun dia ariba peticion di Marisol.
Juli 2020 a finalisa cu e scandal grandi den Parlamento di Aruba, caminda a trata un mocion di desconfiansa contra Marisol. A sigui un intento pa intermediacion di parti di Prome Ministro Wever-Croes, pero finalmente na October Gobierno a pidi Marisol retira.
Den un scandal politico basta pisa den tempo di pandemia pues e asunto di tereno pa su ruman a wordo atende dor di Marisol, cu a regla e asunto cu DIP den algun dia.
DIARIO pues ta sigui cu su investigacion cu sigur tin atencion di Aruba.
