ORANJESTAD(AAN)—Si Pueblo di Aruba mester acudi na urna electoral dia 25 di Juni proximo, ta pa un motibo fundamental den gobernacion di Aruba.
E forma cu Aruba ta wordo goberna ta basa riba democracia, cu ta bira realidad di un Pueblo na momento cu Pueblo directamente ta dicidi riba maneho di e pais.
Ya cu tur habitante di Aruba no por expresa nan mes conhuntamente tur dia pa bisa kico mester pasa na e pais, a introduci e sistema di eleccion den cual Pueblo ta eligi representantenan cu ta bira Miembro di Parlamento, cu ta forma un sosten mayoritario pa un Gobierno cu ta encarga cu e maneho diario di e pais a base di e Programa di Gobierno, den cual e loke a wordo presenta durante eleccion ta bira base di maneho y di gobernacion.
Parlamento di Aruba ta ricibi un sueldo y otro beneficionan cu por wordo considera suficiente pa nan haci un trabou, cu segun nan sueldo ta un trabou di un ehecutivo sin cu ningun condicion ta wordo mara na esaki.
Ta bay mas leu. Pa e Miembro di Parlamento por traha su trabou, e ta ricibi fondo pa e por haya asistencia profesional den buskeda di informacion cu e mester.
Parlamento di Aruba por haci uzo di Algemene Rekenkamer Aruba, cu ta duna contenido na e Derecho di Budget di e representacion di Pueblo y ta atende cu cada cent cu Gobierni gasta of haya na entrada.
Parlamento di Aruba ta ricibi conseho huridico di Raad van Advies. Parlamento di Aruba tin derecho pa haya tur informacion cu e mester den su trabou di tur Departamento di Gobierno.
Pues un Miembro di Parlamento por haci su trabou di proteha interes di Pueblo como representante directo di Pueblo cu loke Pueblo ta duna Parlamento, cu di otro banda mester entrega Pueblo Integridad den trabou y mester sirbi solamente e interes di Pueblo.
Pa interes di Pueblo wordo sirbi, tur ciudadano, Gobierno y Parlamento mester actua di acuerdo cu Ley, cu ta e base di e pais Aruba.
For di 2018 ora e estado financiero mester a wordo saca for di e colapso den cual el a wordo hereda na 2017 y economia di Aruba mester a wordo libera despues di tabata rehen di Citgo, DIARIO a informa Aruba cu Parlamento di Aruba a faya den su trabou di controlador di Gobierno entre otro y a permiti Mike Eman pa haci y deshaci cu Aruba manera e tabata kier.
DIARIO a acusa y ta sigui acusa tanto Gobierno Mike Eman como e Miembronan di Parlamento cu a sostene Gobierno Mike Eman, di tabata autor di caida dramatico di Aruba, cu a scapa di bira un republica di banana pasobra e ta parti di Reino Hulandes cu a actua y pasobra Gobierno Mike Eman mester a bay cas na 2017 y asina habri porta pa un Gobierno nobo cu a descubri e desaster di Mike Eman pero a actua tambe.
E proyecto di Citgo y e rapport di Bo Aruba ta e dos pruebanan di mas grandi cu DIARIO a uza pa mustra Pueblo di Aruba cu e miembronan di Parlamento di AVP for di 2009 pa 2017 a representa e tres macaconan cu no ta mira, no ta tende y no ta bisa nada y asina a permiti Mike Eman haci y deshaci manera e tabata kier hunto cu su Ministronan.
Awe escandalo tras di escandalo ta alcansa Aruba cu mester traha riba su recuperacion.
Pero pa un hende y un Pueblo por sigui cana den bon direccion, e mester habri su wowo, su horea pa e por practica Husticia cu su pais y expresa su mes na urna electoral pa loke ta husto.
DIARIO a percura pa Aruba tabata bon informa y semper a haci mencion di tur rapport y informacion oficial pa asina Pueblo mes por verifica kico a pasa cu Aruba, cu hamas a pensa cu e lo por mira, tende y hole loke a destrui Aruba na man di Mike Eman y su grupo, cu a destrui Aruba dor di kibra Ley durante e tempo cu el a controla Parlamento, cu a faya di 2009 pa 2017.
