Talento Arubiano y turismo central den bishita di Minister Cicilia na BUas

Na Breda na Hulanda...

ORANJESTAD (AAN): Minister di Turismo, Labor y Transporte, mr. Wendrick Cicilia, a bishita Breda University of Applied Sciences (BUas) riba dialuna. Durante e bishita, e oportunidadnan di estudio pa hobennan Rubiano, e conexion cu Colegio Educacion Profesional Intermedio (EPI) y e posibilidad pa amplia cooperacion entre Aruba y e institucion na Hulanda a figura como temanan importante.

   Dos docente di e universidad, Jennifer Richardson y Sasha Ridpath, a comparti nan experiencia cu studiantenan Arubiano y nan vision riba e aporte cu enseñansa den turismo y hospitalidad por duna na desaroyo di Aruba.

   Breda University ta combina conocemento teoretico cu experiencia practico, proyectonan pa compania y oportunidad pa desaroya un red internacional. E institucion ta prepara profesionalnan den diferente ramo, entre nan turismo, hoteleria, hospitalidad, recreaccion y organizacion di evento.

   Docente RubIano ta mantene conexion cu Aruba: Jennifer Richardson, docente di marketing den e programa di Hotel Management, a splica cu, aunke actualmente no tin un grupo grandi di studiantenan Arubiano na BUas, tin hopi hoben di Aruba cu interes den turismo.

   Como docente Rubiano, e ta percura pa mantene contacto cu e studiantenan y ofrece nan e sosten cu nan mester. E acompañamento aki ta conta tambe pa otro studiantenan internacional cu ta adapta na un ambiente nobo di estudio y bida.

   Richardson mes a gradua na Universidad di Aruba, caminda el a biba un experiencia cu e ta recorda cu hopi satisfaccion. Despues di a muda pa Hulanda, el a sigui su trayectoria den enseñansa na un institucion cu tin un enfoke fuerte riba turismo y hospitalidad.

   Segun Richardson, e ambiente na Breda University ta di un calidad cu ta record’e di Aruba. E conexion cu su isla ta keda fuerte y e ta desea sigui contribui na turismo y na desaroyo di Aruba, tambe riba distancia desde Hulanda.

   Un bista mas amplio riba turismo: Sasha Ridpath, docente cu ta contribui na desaroyo di e curiculo di Tourism Management, a destaca e caracter internacional di BUas. E programa ta trata temanan manera mobilidad y desaroyo di destinacion, dunando studiantenan un perspectiva amplio riba e industria turistico.

   Pa hobennan Arubiano, e enfoke aki por yuda amplia nan horizonte y profundisa nan conocemento di un sector cu ta ocupa un lugar central den economia di nan pais.

   Ridpath a indica cu actualmente tin, entre e studiantenan Rubiano, dos cu a bin di Colegio EPI y un cu a bin di Colegio Arubano. Segun e docente, cu tambe ta Rubiano, tur e studiantenan for di Aruba ta haciendo bon, ta gusta e contenido di nan estudio y pocopoco ta adapta na e clima friu di Hulanda.

   Posibilidad pa intercambio cu Colegio EPI: Un punto cu ta ofrece perspectiva pa futuro ta e conexion entre e curiculo di Colegio EPI y esun di Breda University. Ridpath a splica cu e programanan ta combina bon cu otro y cu e universidad ta explora con por traha hunto y habri oportunidad pa intercambio entre Aruba y Hulanda. Un cooperacion asina por amplia e posibilidadnan pa studiantenan adkiri experiencia internacional y sigui desaroya nan conocemento den turismo.

   Den Hotel Management, BUas ta cubri temanan manera marketing, finansa, liderazgo, sostenibilidad y digitalisacion. E programa di cuater aña, cu les na Ingles, ta inclui entrenamento practico, bishita na compania y un stage internacional. Aruba ta figura entre e destinacionnan pa stage cu e institucion ta menciona.

   BUas ta ofrece tambe Leisure & Events Management, enfoca riba creaccion y maneho di experiencia recreativo y evento, cu posibilidad pa specialisa den festival, evento empresarial, deporte, atraccion y parke tematico.

   E bishita di Minister Cicilia ta pone atencion riba e relacion entre enseñansa y e futuro di turismo na Aruba. E experiencia di e docentenan y e conexion cu Colegio EPI ta mustra cu tin posibilidad pa sigui acerca talento Arubiano, conocemento internacional y e necesidadnan di e sector.

   Breda University of Applied Sciences ta forma profesionalnan pa turismo y hospitalidad.  E ta situa na Breda, Hulanda, ta un institucion di enseñansa superior cu ta prepara studiantenan pa un carera den diferente sector, entre nan turismo, hoteleria, hospitalidad, recreaccion y organizacion di evento. E universidad ta combina conocemento teoretico cu experiencia practico, proyectonan pa compania y oportunidad pa desaroya un red internacional.

   Den su programa Hotel Management, BUas ta prepara futuro profesionalnan pa maneha operacionnan den industria di hospitalidad. E estudio ta cubri temanan manera mercadeo, finanzas, liderazgo, sostenibilidad y digitalisacion. Studiantenan ta participa den entrenamento practico, bishita na companianan y un stage internacional. Aruba ta figura entre e destinacionnan pa stage cu e institucion ta menciona. E programa ta dura cuater aña y ta ofrece les na Ingles.

   Ademas, BUas ta ofrece Leisure & Events Management, un programa enfoca riba creaccion y maneho di experiencianan recreativo y evento. E estudio ta inclui posibilidad pa specialisa den festivalnan di musica, eventonan empresarial, deporte y maneho di atraccionnan y parke tematico. E programa regular ta dura cuater aña, cu opcion pa studia na Hulandes of Ingles.